Opera təhlükəli “copy-paste” hücumlarını bloklayan yeni funksiyanı təqdim etdi

    Opera istifadəçiləri son dövrlərdə sürətlə yayılan “ClickFix” adlı kibertəhdidlərdən qorumaq üçün yeni Paste Protect təhlükəsizlik funksiyasını istifadəyə verib. Şirkətin məlumatına görə, bu texnologiya brauzer səviyyəsində bu tip hücumlara qarşı yerli müdafiə təqdim edən ilk həllərdən biridir. “ClickFix” hücumları ilk baxışdan olduqca adi görünür. İstifadəçi saxta CAPTCHA və ya “Mən robot deyiləm” düyməsinə klik etdikdə, zərərli kod gizli şəkildə kompüterin mübadilə yaddaşına (clipboard) kopyalanır. Daha sonra istifadəçiyə “Win + R” düymələrini sıxmaq, “Ctrl + V” ilə kodu yapışdırmaq və “Enter” düyməsini basmaq kimi təlimatlar göstərilir.

    İstifadəçi bu addımları yerinə yetirdikdə, sistem zərərli skriptləri işə salaraq cihazına virus yükləyə bilər. Bu viruslar arasında xüsusilə parolları, brauzerdə saxlanılan məlumatları, kukiləri və avtomatik giriş məlumatlarını oğurlayan “infostealer” proqramları yer alır. Opera-nın yeni Paste Protect funksiyası isə bu cür təhlükəli əmrləri onlar istifadəçinin clipboard-una kopyalanmadan əvvəl aşkarlayır. Sistem şübhəli əmri bloklayır, istifadəçiyə xəbərdarlıq göstərir və ünvan sətrində qırmızı xəbərdarlıq ikonu ilə təhlükəni bildirir.

    Yeni təhlükəsizlik funksiyası Windows, macOS və Linux əməliyyat sistemlərini dəstəkləyir və standart olaraq aktiv vəziyyətdə təqdim edilir. İstifadəçilər istəsələr, Settings → Privacy & Security → Paste Protect bölməsindən funksiyanı aktiv və ya deaktiv edə bilərlər. Opera bildirir ki, yeniləmə mərhələli şəkildə bütün regionlarda istifadəçilərə təqdim olunacaq.