Safeworld süni intellektli robotların təhlükəsizliyini sınaqdan keçirəcək

    “Safeworld” generativ süni intellektlə idarə olunan robotların insanlara zərər verib-verməyəcəyini yoxlamaq üçün fəaliyyətə başladığını elan edib. Belə robotların davranışını ənənəvi alqoritmlər qədər dəqiq proqnozlaşdırmaq olmur. Şirkət riskləri real insanların davranışını canlandıran simulyasiyalarda qiymətləndirəcək. Məqsəd robotlar geniş istifadəyə çıxmazdan əvvəl təhlükəli halları aşkar etməkdir.

    “Safeworld” şirkətini Ding Zhao, təcrübəli startap rəhbəri Kyle Wong və maşın öyrənməsi üzrə mühəndis Simo Rachidi yaradıb. Ding Zhao həmçinin “Carnegie Mellon University”-dəki “Safe AI” laboratoriyasına rəhbərlik edir. Startap ilkin mərhələdə 12 milyon dollardan çox (20,4 milyon manatdan çox) investisiya cəlb edib. Maliyyələşməyə “Shine Capital” və “a16z Speedrun” rəhbərlik edib. Daha 5 qurum da startapa sərmayə qoyub.

    Şirkət robotların idarəetmə sistemini insanların real davranışlarının canlandırıldığı rəqəmsal mühitdə sınaqdan keçirir. Məsələn, zavodda kənardan görünməyən döngənin rəqəmsal surəti “Genesis” və ya “MuJoCo” proqramında yaradılır. Robotun modeli işlədiyi proqramla birlikdə həmin mühitə yerləşdirilir. Ardınca insanlarla qarşılaşa biləcəyi halları yoxlamaq üçün minlərlə fərqli ssenari işə salınır.

    Sınaqlarda insanların yıxılması, qaçması, əyilməsi və qutu daşıyarkən robotun qarşısına çıxması kimi hallar yoxlanılır. Belə vəziyyətləri real şəraitdə dəfələrlə sınaqdan keçirmək həm çətin, həm də təhlükəlidir. “Gritt Robotics” təhlükəsizlik simulyasiyalarını hazırlamaq üçün “Safeworld” ilə işləyir. Şirkətin robotları iri günəş elektrik stansiyalarında panellərin quraşdırılmasına kömək edir və işçilərlə yanaşı işləyir.

    “Safeworld” hesab edir ki, istehsalçıların daxili sınaqları ilə yanaşı, müstəqil yoxlama da lazım olacaq. Bu yanaşma təhlükəli hallar barədə məlumatların rəqib şirkətlər arasında paylaşılmasını asanlaşdıra bilər. Startap məhsulunu ayrıca platforma, yoxsa xidmət kimi təqdim edəcəyinə hələ qərar verməyib. Şirkət nümayiş üçün hazırlanan nümunələrə deyil, təcrübəsiz insanların yanında geniş miqyasda işləyəcək robotlara diqqət yetirir.