"Tosuncuk" ləqəbli türk dələduz Mehmet Aydın, 45 376 il 6 ay həbs cəzasına məhkum edilib

     Video oyunlar insanlara maraqlı layihələr yaratmaq imkanı ilə yanaşı həm də dələduzluq üçün yeni yollar açdı. Lakin gec-tez qanun hər bir fırıldaqçını yaxalayır və Farm Bank (Çiftlik Bank) yaradıcılarından biri olan "Tosuncuk" ləqəbli Mehmet Aydın bunu öz üzərində hiss etdi. Belə ki, Mehmet Aydın - ilk baxışda zərərsiz görünən online-ferma oyununun müəllifi - 45 376 il 6 ay həbs cəzasına məhkum edilib. Prokurorluq isə onun üçün 88 000 il həbs cəzası tələb edirdi.

     Məsələ ondadır ki, bu oyun sadəcə bir əyləncə platforması deyil, əslində insanları aldatmaq üçün qurulmuş maliyyə piramidası olub. Bu sxem vasitəsilə Mehmet Aydın 132 000-dən çox insanı aldatmağa müvəffəq olub. Farm Bank-da, digər oxşar oyunlarda olduğu kimi, oyunçular mal-qara və məhsul ticarəti etməyə təşviq edilirdi. Lakin burada önəmli bir məqam vardı - bütün əməliyyatlar real pulla həyata keçirilirdi. Mehmet Aydın istifadəçilərə real gəlir əldə edəcəklərini vəd edirdi, lakin adətən bu cür sxemlərdə olduğu kimi, bu da bir yalan idi.

     2018-ci ildə Aydın xidməti bağlayaraq Cənubi Amerikaya qaçdı və 511 milyon türk lirəsi məbləğində vəsaiti özü ilə apardı. Onun barəsində beynəlxalq axtarış elan olundu, lakin 2021-ci ildə Aydın könüllü şəkildə təslim oldu. Məhkəmədə Mehmet Aydın qardaşı Fatih Aydın ilə birlikdə mühakimə olundu. Dinləmələr zamanı Mehmet Aydın heç kimi aldatmaq niyyətində olmadığını israrla bildirdi. Hətta o, iddia etdi ki, oyunçulara qazandıqları pulları qaytarmağı planlaşdırırdı.

Mənbə: Turkiyetoday