2 nanometrlik prosessor səbəbilə iPhone 18 Pro-nun qiymətində artım ola bilər

     Apple iPhone 18 üçün ciddi yeniləmə hazırlayır. Digital Chat Station ləqəbli məşhur insayderin məlumatına görə, şirkət performansda nəzərəçarpacaq artım təmin edəcək TSMC-nin yeni 2 nanometrlik prosessorundan istifadə etməyi planlaşdırır. Lakin bununla yanaşı, qiymətlərin də artması mümkündür. Yeni prosessorun istehsalı bahalıdır, xüsusilə də ilkin mərhələdə, istehsal həcmləri məhdud olduğu vaxt. Buna görə də Apple böyük ehtimalla bu prosessoru yalnız iPhone 18 Pro və iPhone 18 Pro Max modellərində tətbiq edəcək.

     İnsayder qeyd edib ki, istehsalın ilkin mərhələsindəki məhdudiyyətlər yeni modellərin əlçatanlığına təsir göstərə bilər. Onun sözlərinə görə, qiymət də xeyli arta bilər - baxmayaraq ki, hələlik konkret rəqəmlər açıqlanmayıb. Bunun səbəbi yalnız daha bahalı komponentlər deyil, həm də tariflərlə bağlı ümumi vəziyyətdir. Əgər bu şayiələr təsdiqlənərsə, iPhone 18 Pro təkcə ən güclü deyil, həm də Apple tarixindəki ən bahalı iPhone modeli olacaq. Üstəlik, ilkin məlumatlara əsasən, bu model ilk dəfə dəyişən diafraqmalı kamera və çəkiliş üçün digər təkmilləşdirmələrlə təchiz ediləcək. Kamera avtomatik olaraq işıqlandırmaya uyğunlaşacaq və gündüz, eləcə də gecə daha yaxşı fotolar çəkməyə imkan verəcək.