ABŞ Apple-a xəbərdarlıq etdi

    ABŞ hökuməti Apple-ın Çinin yaddaş çipləri istehsalçısı CXMT-dən məhsul almaq planına qarşı çıxıb. ABŞ-nin ticarət naziri Hovard Latnik Apple-a Çin istehsalı yaddaş çiplərindən istifadə etməməklə bağlı açıq xəbərdarlıq edildiyini bildirib. Apple hazırda texnologiya sektorunda yaşanan yaddaş çipi çatışmazlığı və yüksək qiymətlər səbəbindən alternativ təchizatçılar axtarır. Şirkətin nəzərdən keçirdiyi variantlardan biri Çinin CXMT şirkətindən Mac kompüterləri üçün RAM çiplərinin alınmasıdır. Apple artıq CXMT-nin yaddaş çiplərini sınaqdan keçirir. Lakin bu plan ABŞ hökumətində ciddi narahatlıq yaradıb.

    Apple-ın Hyustondakı yeni Advanced Manufacturing Center müəssisəsini ziyarət edən ABŞ-nin ticarət naziri Hovard Latnik bildirib ki, Tramp administrasiyası bu addımı dəstəkləmir. Latnikin sözlərinə görə, yaddaş çatışmazlığını aradan qaldırmaq üçün başqa yollar tapılmalıdır və ABŞ şirkətlərinin Çin istehsalı yaddaşlardan istifadə etməsi arzuolunan deyil. Jurnalistlərin bu mövqenin birbaşa Apple-a çatdırılıb-çatdırılmadığı barədə sualına nazir müsbət cavab verib. Məsələni Apple üçün daha mürəkkəb edən əsas amillərdən biri CXMT-nin ABŞ Müdafiə Nazirliyinin "Chinese Military Companies" siyahısında olmasıdır. Pentaqon bu siyahıya Çin ordusu ilə əlaqələrinin ola biləcəyini düşündüyü şirkətləri daxil edir.

    Hazırkı qaydalar Apple-ın CXMT-dən birbaşa çip almasını tamamilə qadağan etmir. Lakin şirkətin gələcəkdə ABŞ-nin daha sərt "Entity List" siyahısına salınması ehtimalı da müzakirə olunur. CXMT bu siyahıya daxil edilərsə, ABŞ şirkətlərinin onunla ticarət imkanları ciddi şəkildə məhdudlaşdırıla bilər. Belə vəziyyətdə Apple CXMT-ni təchizatçı kimi seçsə belə, sonradan həmin təchizat zəncirini yenidən itirə bilər.