Airbnb “Rezerv et, Sonra Ödə” funksiyasını qlobal miqyasda istifadəyə verdi

    Technote.az “TechCrunch” platformasına istinadən bildirir ki, Airbnb “Reserve Now, Pay Later” (İndi Rezerv et, Sonra Ödə) funksiyasını qlobal miqyasda istifadəyə verdiyini açıqlayıb. Bu funksiya istifadəçilərə bron zamanı dərhal ödəniş etmədən yerləşmə obyektini rezerv etməyə imkan verir.

    Şirkət bu funksiyanı ötən il ABŞ-də daxili səyahətlər üçün test etmişdi. Yeni sistemə əsasən, yalnız “flexible” və ya “moderate” ləğv siyasətinə malik elanlar öncədən ödənişsiz rezerv üçün uyğun sayılır. Bu halda istifadəçidən ödəniş rezerv zamanı deyil, check-in tarixinə daha yaxın vaxtda tutulur. Model elektron ticarətdə geniş yayılmış “buy now, pay later” mexanizminə bənzəyir və xüsusilə daha bahalı səyahət planlarını istifadəçilər üçün daha əlçatan edir. Airbnb-in məlumatına görə, funksiyanın istifadəyə verilməsindən sonra uyğun rezervasiyaların 70 %-i bu model vasitəsilə həyata keçirilib.

    Şirkətin 2025-ci ilin dördüncü rübünə dair maliyyə hesabatı zamanı Airbnb-in maliyyə direktoru Elli Mertz bildirib ki, “Reserve Now, Pay Later” funksiyası rübdə rezerv edilən gecələrin sayının artmasına töhfə verib. Onun sözlərinə görə, bu model rezervasiyaların daha erkən edilməsinə və xüsusilə dörd və daha çox yataq otağı olan böyük evlərə marağın artmasına səbəb olub. Bu isə orta günlük qiymətin yüksəlməsinə təsir göstərib.