Alışqan boyda Relay Q mikrofonu pıçıltı ilə kompüteri idarə edir

    Berlində keçirilən “IFA” sərgisində “Nothing” şirkətinin keçmiş dizaynerlərinin hazırladığı “Relay Q” adlı süni intellekt funksiyalı mikrofon nümayiş etdirilib. Kiçik alışqan ölçüsündə olan cihaz danışıqla kompüter arasında vasitə rolunu oynayır. Düyməni basılı saxladıqda mikrofon hətta pıçıltı ilə deyilənləri də eşidir. Bununla istifadəçi sakit ofisdə ətrafdakıları narahat etmədən kompüterə mətn diktə edə və əmrlər verə bilər.

    “Relay Q” mikrofonunun yuxarı hissəsində danışmağa başlamaq üçün yumşaq düymə var. Düyməni 2 dəfə basdıqda “Enter” və ya göndərmə əmri işə düşür. Cihaz gümüşü və elektrik mavisi, eləcə də açıq mavi və narıncı rəng birləşmələrində hazırlanıb. Mikrofonun uc hissəsini çıxarıb daxili maqnit vasitəsilə yaxaya taxılan kiçik aksesuara çevirmək mümkündür.

    Mikrofon yaxaya taxıldıqda səs yazısını başlatmaq üçün əsas modulun düyməsini basılı saxlamaq lazımdır. Digər seçim isə “iPhone” smartfonunun arxasına qoşulan “MagSafe” pultudur. “Relay Q” yalnız “Relay” masaüstü proqramı ilə işləyir. Bu proqram “Google Gemini” sistemi əsasında fəaliyyət göstərir. Hazırda yalnız “macOS” ilə uyğunluq var. “Windows” və “Android” dəstəyi daha sonra əlavə olunacaq. Verilən əmrlərin yerinə yetirilməsi üçün proqrama digər tətbiqlərə giriş icazəsi vermək lazımdır.

    Nümayiş zamanı mikrofona pıçıltı ilə elektron məktub hazırlamaq tapşırılıb. Məktubda bir şəxsə müəllif kimi əməkdaşlıq təklif olunmalı idi. Sistem “Gmail” xidmətini açıb və dəvət mətnini avtomatik hazırlayıb. Proqramda fərdiləşdirmə imkanları da var. İstifadəçi yazı üslubu və söz seçimi ilə bağlı qaydaları əvvəlcədən daxil edə bilər. Bundan sonra süni intellekt mətnləri həmin qaydalara uyğun hazırlayır.

    “Relay Q” hazırda ilk dəstəkçilər üçün 150 dollar (təxminən 255 manat) qiymətinə ön sifarişə açıqdır. Paketə “MagSafe” pultu və “Relay Unlimited” proqramına 12 aylıq abunə daxildir. Pult ayrıca aksesuar kimi də satılacaq. Cihazın 2027-ci ilin yanvarında göndərilməsi planlaşdırılır. İstehsalçı bildirir ki, satışın başlanmasına yaxın qiymət arta bilər.