Amazon Alexa+ Kanadada istifadəyə verildi!

    Technote.az “Engadget” platformasına istinadən bildirir ki, ABŞ-dən kənarda ilk dəfə olaraq Amazon-un növbəti nəsil rəqəmsal asistenti Alexa+ Kanadada istifadəyə verilib. Şirkət bu xidməti fevral ayında təqdim etmişdi və son aylarda getdikcə daha çox istifadəçiyə çatdırmağa başlayıb.

    ABŞ versiyası kimi, Kanadadakı istifadəçilər də Alexa+ ilə tamamilə təbii dildə danışa bilirlər. Məsələn, “Mən üşüyürəm” desələr, sistem evin istiliyini artırır, “Çox qaranlıqdır” desələr, işıqları yandırır.

    Amazon-un açıqlamasına görə, Alexa+ Kanada mədəniyyətini və yerli ifadələri anlayır. O, ölkənin hokkey komandaları, kanadalı musiqiçilər və digər regional mövzuları tanıyır. Bundan əlavə, kanadalıların istifadə etdiyi xidmətlərlə inteqrasiya olunur: OpenTable vasitəsilə restoranlarda yer ayırmaq, CBC xəbərlərinə qoşulmaq və alış-veriş üçün e-ticarət platformalarında axtarış aparmaq mümkündür. Tezliklə Yelp, Uber Eats, Suno və TripAdvisor dəstəyi də əlavə ediləcək.

    Alexa+ evdəki hər bir istifadəçiyə uyğun ton seçə bilir, onların gününə uyğun fərdi rutinlər təklif edir. Məsələn, iş gününün stressini yaşayan biri üçün meditasiya məsləhətləri verə bilər. Bununla yanaşı, alış-verişdə ən uyğun qiymətləri tapmaq, məhsul xüsusiyyətlərini müqayisə etmək, Amazon Canada rəylərini qısa şəkildə ümumiləşdirmək də mümkündür.

    Yeni assistant hazırda Early Access mərhələsində pulsuzdur, lakin onu sınamaq üçün istifadəçilər Echo Show 8, Echo Show 11, Echo Dot Max və ya Echo Studio kimi yeni cihazlardan birini əldə etməlidirlər. Bu mərhələdən sonra Alexa+ Prime abunəçiləri üçün yenə pulsuz olacaq, digərləri isə ayda 28 Kanada dolları ödəməli olacaqlar.