Amazon Prime Video-da 4K izləmək artıq əlavə ödəniş tələb edəcək

    Technote.az “Mashable” platformasına istinadən bildirir ki, Amazon Prime Video abunə sistemi ilə bağlı mühüm dəyişikliklər edir. Yeni qaydalara əsasən, artıq standart istifadəçilər ən yüksək keyfiyyətlil 4K/UHD video yayımlarına avtomatik çıxış əldə etməyəcək. Şirkət bu funksiyanı daha bahalı “Ultra” adlı yeni abunə səviyyəsinə keçirir.

     Əvvəllər aylıq 14.99 dollar və ya illik 139 dollar ödəyən Prime üzvləri həm 1080p HD, həm də 4K keyfiyyətdə kontent izləyə bilirdi. Reklamsız izləmə istəyənlər isə əlavə 3 dollar ödəyirdi. Yeni sistemdə isə əsas Prime Video paketi yalnız 1080p HD yayımı dəstəkləyəcək, 4K və ən yüksək görüntü-səs texnologiyaları isə əlavə aylıq 4.99 dollar tələb edən Ultra paketinə daxil ediləcək.

    Amazon istifadəçiləri yüksəltməyə təşviq etmək üçün Ultra abunəliyinə bir sıra əlavə imkanlar da əlavə edib. Bu paketdə oflayn izləmə üçün endirilə bilən kontent sayı 25-dən 100-ə yüksəlir, Dolby Atmos səs və Dolby Vision görüntü dəstəyi təqdim olunur. Bundan əlavə, eyni hesabdan paralel izləmə limiti də 3-dən 5 cihaza qədər artırılır.

    Bununla belə, əsas Prime istifadəçiləri tamamilə imkansız qalmır. Yeniləmə ilə onlar da Dolby Vision dəstəyi əldə edəcək və eyni anda izləyə bilən cihaz sayı 3-dən 4-ə yüksələcək. Ekspertlər qeyd edir ki, real 4K yayımı hər kəs üçün praktik deyil. Bir çox istifadəçinin internet sürəti və ya istifadə etdiyi cihazlar həqiqi 4K keyfiyyətini dəstəkləmir. Buna görə də Ultra paketinin dəyəri əsasən ev kinoteatrı qurğularından istifadə edən izləyicilər üçün daha mənalı hesab olunur.