Anker-in güclü Laptop Power Bank-i yenidən ucuz qiymətə düşüb

    Technote.az “The Verge” platformasına istinadən bildirir ki, Black Friday endirimlərindən sonra aksiyalar xeyli səngisə də, Anker bu sakitliyi pozmağı bacarıb. Brendin güclü və iri tutumlu Laptop Power Bank modeli yenidən endirimə düşüb. Hazırda cihaz Amazon və Walmart platformalarında 87,99 dollara təklif olunur ki, bu da əvvəlki qiymətlə müqayisədə 47 dollar ucuzdur və Black Friday dövründə görülən ən aşağı qiymətlə eynidir.

    Anker-in bu modeli xüsusilə noutbuk istifadəçiləri üçün nəzərdə tutulub. 25 000 mAh (90 Wh) tutuma malik powerbank iki ədəd USB-C kabeli ilə gəlir. Onlardan biri açılıb-yığılan (retractable) quruluşa malikdir, digəri isə eyni zamanda daşıma üçün tutacaq rolunu oynayır. Hər iki kabel ikitərəflidir və passthrough charging (eyni anda doldurma və enerji ötürmə) funksiyasını dəstəkləyir.

    Cihazda əlavə olaraq 1 USB-A və 1 USB-C portu da mövcuddur. Bu isə eyni anda MacBook Pro, smartfon və daha iki cihazı paralel şəkildə enerji ilə təmin etməyə imkan verir. Enerji paylanmasına gəldikdə, iki cihaz qoşulduqda 165 W, üç və ya dörd cihazda isə maksimum 130 W çıxış gücü təqdim olunur.