Apple 3 yeni cihaz hazırlayır: planşet, ağıllı dinamik və TV qurğusu

    “Apple” kodunda tapılan şəkillər şirkətin 3 yeni cihaz hazırladığını göstərir. “HomePod mini 2”, “iPad mini 8” və yeni “Apple TV 4K” modellərinin oktyabrda göstəriləcəyi gözlənilir. Şirkət bu məhsulları “iPhone 18 Pro” və qatlanan “iPhone Duo”dan sonra, ilin sonunadək satışa çıxara bilər. Kodda cihazların görünüşü ilə bağlı ilk detallar da var.

    Yeni “HomePod mini 2” dizayn baxımından 2020-ci ilin sonunda çıxan ilk modelə bənzəyəcək. Koddan əldə edilən şəkillərdə cihaz yaşıl, çəhrayı, mavi, ağ və qara rənglərdə görünür. Yaşıl, çəhrayı və mavi versiyaların rəngləri indiki narıncı, sarı və mavi seçimlərdən daha yumşaq çalardadır. Texniki göstəricilər barədə hələ məlumat yoxdur.

    “iPad mini 8” modelində əsas dəyişiklik prosessor olacaq. Planşetdə 2 il əvvəl satışa çıxan indiki modelin “A17 Pro” çipi əvəzinə yeni “A20 Pro” işlədiləcək. Eyni çip “iPhone 18 Pro”, “iPhone 18 Pro Max” və “iPhone Duo” modellərində də var. Bundan başqa, ön kamera planşetin üfüqi kənarına keçirilib. Ekranın yuxarı hissəsindəki oyuq əlavə dinamikin ola biləcəyinə işarə edir.

    “iPad mini 8” daha yaxşı su qoruması və OLED ekran da ala bilər. Səsi vibrasiya ilə yaradan yeni dinamik sisteminin planşetin suya davamlılığını artıracağı gözlənilir. OLED ekran qara rəngi daha dərin göstərir və görüntüdə kontrastı yüksəldir. Hazırda belə ekran daha böyük “iPad Pro” modellərində işlədilir. Ancaq kodda bu 2 yenilik birbaşa təsdiqlənməyib.

    4-cü nəsil “Apple TV 4K” görünüşcə indiki modelə çox bənzəyir. Hazırkı versiya təxminən 4 ildir yenilənməyib, ancaq sızan şəkillər yeni cihazın texniki göstəricilərini açıqlamır. Əvvəlki məlumatlarda “A17 Pro” çipinin və “Apple” istehsalı “N1” rabitə çipinin işlədilə biləcəyi qeyd olunub. “N1” Bluetooth və simsiz internet bağlantısını idarə edir.