Apple 50 illiyini qeyd edir!

    Technote.az “Apple Insider” platformasına istinadən bildirir ki, Tim Cook şirkətin 50 illiyi münasibətilə xüsusi məktub yayımlayaraq həm keçmişə ehtiram göstərib, həm də gələcək planlara diqqət çəkib.

     Adətən keçmişə çox da qayıtmayan Apple üçün yarım əsrlik yubiley mühüm mərhələ hesab olunur. Bu münasibətlə yayımlanan məktubda Tim Cook şirkətin yaranma dövrünə və illər ərzində formalaşan dəyərlərinə toxunur.

    Məktubda xüsusilə Steve Jobs dövrünə və 1970-ci illərin ruhuna istinadlar yer alır. Cook, həmçinin Mike Markkula tərəfindən 1976-cı ildə hazırlanmış və şirkətin əsas prinsiplərini müəyyən edən məşhur bir səhifəlik marketinq memorandumunun vizual üslubuna da işarə edir. Həmin sənəddə müştərinin hər zaman ön planda tutulması ideyası vurğulanırdı.

    Cook qeyd edir ki, Apple adətən gələcəyi qurmağa daha çox fokuslanır, lakin 50 illik yubiley şirkətin bu günə qədərki yolunu və bu yolda rol oynayan əməkdaşları və istifadəçiləri xatırlamaq üçün xüsusi bir fürsətdir.

    Şirkət ayrıca açıqlamada bildirib ki, yubiley təkcə məktubla məhdudlaşmayacaq. İl ərzində Apple və onun qlobal icması bu tarixi hadisəni müxtəlif tədbirlərlə qeyd edəcək. Bununla yanaşı, şirkət gələcəkdə də ətraf mühitin qorunması, təhsil və icma inkişafı sahələrində fəaliyyətini davam etdirəcəyini vurğulayıb.