Apple ağıllı eynəkləri jestlərlə idarə olunacaq

    Technote.az “Apple Insider” platformasına istinadən bildirir ki, Apple-ın uzun illərdir üzərində çalışdığı ağıllı eynəklərlə bağlı yeni detallar ortaya çıxıb. Son məlumatlara görə, şirkətin bu cihazı jestlərlə idarə olunan sistemə əsaslanacaq və iki kamera ilə təchiz ediləcək. Məlumatı yayan Apple-a yaxın mənbələr bildirir ki, eynəkdə biri yüksək keyfiyyətli foto və video çəkilişi üçün, digəri isə jestləri və vizual məlumatları analiz etmək üçün nəzərdə tutulmuş iki kamera yerləşdiriləcək. Aşağı keyfiyyətli kamera əsasən istifadəçinin əl hərəkətlərini tanımaq və Siri ilə inteqrasiyanı təmin etmək üçün istifadə olunacaq.

    Maraqlıdır ki, cihazda 3D kamera və ya LiDAR sensorunun olmayacağı iddia edilir. Bunun əsas səbəbi isə enerji sərfiyyatıdır. Apple eynəyin yüngül və nazik qalması üçün daha kiçik batareyadan istifadə etməyi planlaşdırır. Bu yanaşma əslində sürpriz deyil. Çünki Apple Vision Pro artıq jest əsaslı idarəetmədən istifadə edir və şirkətin əvvəlki patentlərində də bu texnologiyanın digər cihazlara genişləndiriləcəyi göstərilib. Məsələn, istifadəçilərin sadəcə barmaqla obyektə işarə edərək onun haqqında məlumat əldə etməsi kimi funksiyalar üzərində işlənir.

    Bundan əlavə, bəzi məlumatlara görə, Apple-ın bu ağıllı eynəkləri ekran olmadan təqdim oluna bilər. Yəni cihaz daha çox iPhone üçün əlavə “AI köməkçi” rolunu oynayacaq və istifadəçiyə ətraf mühit haqqında məlumat, foto/video çəkilişi və səsli əmrlərlə idarə imkanı verəcək. Şirkətin baş direktoru Tim Cook üçün bu məhsulun prioritet olduğu və Apple-ın süni intellekt əsaslı geyilə bilən texnologiyalar sahəsində ciddi addımlar atdığı da vurğulanır. Hazırda cihazın təqdimat tarixi tam dəqiq deyil. Bəzi mənbələr 2026-cı ilin sonlarını göstərsə də, buraxılışın 2027-ci ilə qalma ehtimalı da yüksək qiymətləndirilir.