Bir neçə müddət bundan öncə məlumat ortaya çıxmışdı ki, Apple bu il iPhone 15 Pro smartfonlarında səsin tənzimlənməsi üçün nəzərdə tutulmuş fiziki düymələri sensorlu analoqlar ilə əvəz edəcək. Lakin daha sonra bəzi nüfuzlu insayderlər bildirdilər ki, Apple texniki problemlər səbəbilə bu ideyadan imtina edib. Görünür, bu məlumat həqiqəti əks etdirir.

    Belə ki, Apple şirkətinin istehsalat zəncirində iştirak edən partnyorlarından biri məlumat verib ki, iPhone 15 Pro modellərində səsin tənzimlənməsi üçün nəzərdə tutulmuş düymələr sensorlu analoqlar ilə əvəzlənməyəcək. Məlumatı Cirrus Logic adlı şirkət təqdim edib. Məhz bu şirkət sensorlu düymələr üçün vibrasiya elementlərini hazırlamalı idi. Şirkətin investorlar üçün təqdim etmiş olduğu hesabatda isə qeyd edilib ki, Apple bu il təqdim ediləcək iPhone 15 Pro smartfonlarında sensorlu düymələrdən istifadə ideyasından imtina edib.