Apple Çində App Store komissiya faizlərini azaltdı

    Technote.az “TechCrunch” platformasına istinadən bildirir ki, Apple Çində App Store üçün tətbiq etdiyi komissiya faizlərini azaldıb. Şirkətin açıqlamasına görə, Çin tənzimləyicisi ilə aparılan müzakirələrdən sonra ödənişli tətbiqlər və tətbiqdaxili alışlar üçün komissiya 30 %-dən 25 %-ə endirilib.

    Bundan əlavə, tətbiqdaxili abunəliklərin ilk ildən sonrakı avtomatik yenilənmələri üçün alınan komissiya da 15 %-dən 12 %-ə düşürülüb. Şirkət bildirib ki, yeni komissiya dərəcələri 15 mart 2026-cı ildən qüvvəyə minib və inkişaf etdiricilərdən yeni şərtləri qəbul etmələri tələb olunmur.

    Bu qərar həm də Çinin Apple üçün nə qədər vacib bazar olduğunu göstərir. Şirkətin son maliyyə hesabatına görə, Çində iPhone satışları illik müqayisədə 16 % artıb və bu, Apple-ın rekord rüblük nəticə əldə etməsinə kömək edib.

    Maraqlıdır ki, Apple Çində komissiya dəyişikliklərini demək olar ki, mübahisəsiz həyata keçirib. Halbuki Avropa Birliyində şirkət tənzimləyicilərlə illərdir komissiya qaydaları ilə bağlı mübahisə edir. ABŞ-də isə Apple ilə Epic Games arasında baş verən məhkəmə prosesində hakim Apple-ın monopolist olmadığına qərar verib. Bununla belə, tətbiq inkişaf etdiricilərə istifadəçiləri alternativ ödəniş üsullarına yönləndirmək hüququ verilib.

    Apple bildirib ki, Çində tətbiqlərini yayımlayan inkişaf etdiricilər üçün komissiya dərəcələri digər bazarlardakı ümumi tariflərdən yüksək olmayacaq və şirkət ədalətli və şəffaf şərtləri qorumağa davam edəcək.