Apple-dan yeni qayda: təhsil endirimi üçün təsdiq tələb olunacaq

    Technote.az “The Verge” platformasına istinadən bildirir ki, Apple ABŞ-də tələbələr üçün təqdim etdiyi endirim proqramında yeni dəyişiklik edib. Artıq istifadəçilər onlayn şəkildə təhsil endirimi ilə məhsul almaq istəyərkən tələbə və ya müəllim olduqlarını rəsmi şəkildə təsdiqləməli olacaqlar.

    Şirkət bunun üçün üçüncü tərəf yoxlama xidməti olan Unidays platformasından istifadə etməyə başlayıb. Yeni sistem Apple-ın ABŞ təhsil mağazasında görünən bildiriş vasitəsilə istifadəçilərə təqdim olunur. Belə ki, tələbələr, valideynlər və müəllimlər endirim əldə etmək üçün öz statuslarını elektron poçt ünvanı, tələbə bileti və ya təhsil müəssisəsinə aid digər sənədlərlə təsdiqləməlidirlər.

    Məlumata əsasən bu sistem yalnız ABŞ-də deyil, Kanada, Avstraliya, Honq Konq, Türkiyə və Çilidə də mərhələli şəkildə istifadəyə verilir. Apple artıq Böyük Britaniya kimi bəzi ölkələrdə uzun müddətdir ki, Unidays yoxlamasından istifadə edir. Qeyd edək ki, əvvəllər ABŞ-də Apple-ın virtual təhsil mağazasından demək olar ki, hər kəs endirimli qiymətlə məhsul ala bilirdi. Yeni dəyişiklik isə əsasən bu endirimlərdən sui-istifadənin qarşısını almaq məqsədi daşıyır.