Apple gələn il iPhone, iPad və Mac üçün böyük yeniləmə hazırlayır

    Technote.az “The Verge” platformasına istinadən bildirir ki, “Apple” gələn il üçün proqram təminatında ciddi dəyişikliklərə gedir. Bloomberg jurnalisti Mark Gurman-ın məlumatına görə, şirkət parıltılı dizaynları bir kənara qoyub diqqəti iOS 27, iPadOS və macOS-un əsas problemlərini aradan qaldırmağa yönəldəcək. Bu yanaşma 2009-cu ildə təqdim olunan və sürət, stabillik, optimizasiya ilə yadda qalan “Snow Leopard” yeniləməsinə bənzədilir.

    iOS 26-da tətbiq olunan “Liquid Glass” vizual dəyişikliyi göz oxşasa da, son aylarda istifadəçilər bir sıra problemlərlə üzləşib. Şikayətlərə səbəb olan əsas məsələlər arasında səbəbsiz batareya tükənməsi, interfeys donmaları, cihazın öz-özünə qızması və klaviatura xətaları yer alır.

    Gurman-ın sözlərinə görə, Apple mühəndisləri hazırda əməliyyat sistemini addım-addım təmizləyir, lazımsız kodu azaldır və xətaları aradan qaldırır. Şirkət yeni funksiyalar əlavə etməkdənsə, iOS 27-ni daha sürətli, stabil və etibarlı etmək niyyətindədir.