Apple Health+ planlarını dəyişir

    Technote.az “Apple Insider” platformasına istinadən bildirir ki, Apple-ın süni intellekt əsaslı Health+ xidməti ilə bağlı planları daxildə yenidən nəzərdən keçirilir. Məlumata görə, şirkət iri və kompleks bir məhsul buraxmaq əvəzinə, funksiyaları mərhələli şəkildə istifadəçilərə təqdim etməyə qərar verib.

    Bloomberg-in məlumatına əsasən, Apple-ın xidmətlər üzrə rəhbəri Eddy Cue Health bölməsinə nəzarəti ələ aldıqdan sonra strategiyada dəyişiklik edib. Daha əvvəl təqaüdə çıxan Jeff Williams-ın yerinə keçən Cue, “Apple Health+” adı altında ayrıca abunə modeli yaratmaq əvəzinə, planlaşdırılan imkanları kiçik yeniləmələr şəklində təqdim etməyi üstün tutur.

    Sızan məlumatlara görə, Health+ çərçivəsində istifadəçilərin sağlamlıq göstəriciləri əsasında suallar verə biləcəyi AI əsaslı interfeys və peşəkar həkimlərin iştirakı ilə hazırlanmış video məzmunlar planlaşdırılırdı. Apple-ın bu məqsədlə Kaliforniyanın Oklend şəhərində studiya quraraq illərdir videolar çəkdiyi bildirilir. İddialara əsasən, Health+ ilkin olaraq iOS 26 versiyasında təqdim olunmalı idi, lakin layihə daxildə təxirə salınıb. Hesabatda FDA tənzimləmələri və tibbi məlumatlarla bağlı hüquqi risklərin də bu qərarda rol oynadığı vurğulanır.

    Hazırda Apple-ın sağlamlıq strategiyasına Sumbul Desai rəhbərlik edir və o, eyni zamanda Apple Fitness istiqamətinə də cavabdehdir. Şirkətin bu addımı, sağlamlıq funksiyalarını daha az risklə və daha tez istifadəçilərə çatdırmaq məqsədi daşıyır.