Apple HomeView ağıllı ev ekranı üçün dəstək sənədləri yayımladı

    “Apple” “HomeView” cihazının rəsmi çıxışı ilə eyni vaxtda yeni dəstək sənədləri də yayımlayıb. Son 2 gündə əlavə olunan bələdçilərdə üz tanıma, istifadəçi profilləri, nasazlıqların həlli və təmir barədə məlumat verilir. Sənədlər cihazın quraşdırılmasından servisə göndərilməsinə qədər əsas sualları cavablandırır.

    İstifadəçi təlimatında “HomeView” cihazının ilk dəfə necə qurulacağı və ana ekranın fərdiləşdirilməsi izah edilir. Burada “Siri AI” funksiyaları, müxtəlif istifadəçi profillərinin idarəsi və ağıllı ev cihazlarına nəzarət barədə də məlumat var. Eyni evdə yaşayan bir neçə nəfərin cihazdan istifadə etməsi üçün yeni profillərin necə əlavə olunacağı da göstərilir.

    “Apple” üz tanıma sistemi istifadəçini tanımadıqda və ekranda şəxsiyyəti təsdiqləmək tələbi çıxdıqda nə etmək lazım olduğunu ayrıca açıqlayıb. Digər sənədlərdə xəbərdarlıq işarələri, çatışmayan ayar və məlumatlar, tətbiqin işləməməsi, eləcə də məzmunun açılmaması kimi hallar izah olunur. Quraşdırma baş tutmadıqda, cihaz açılmadıqda və ya əmrlərə cavab vermədikdə yoxlanmalı addımlar da sadalanır.

    Servis bölməsində “HomeView” cihazının təmirə və sürətli dəyişdirmə xidmətinə necə hazırlanacağı göstərilir. Buradan seriya nömrəsini tapmaq və uyğun enerji adapterini seçmək qaydalarını da öyrənmək olar. Xüsusi dəstək səhifəsində zəmanətdənkənar təmir üzrə təxmini xərclər də açıqlanır. “Apple”-ın yaxın günlərdə və həftələrdə “HomeView” üçün daha çox dəstək sənədi yayımlayacağı gözlənilir.