Apple ilk iPhone Fold-u təqdim etmədən üçüncü nəsil üzərində işləyir

    Apple ilk qatlanan iPhone modelini hələ təqdim etməsə də, şirkətin artıq cihazın gələcək nəsilləri üzərində işlədiyi bildirilir. Bloomberg-dən Mark Qurmanın məlumatına görə, Apple üçüncü nəsil iPhone Fold modelini 2028-ci ildə bazara çıxarmağı planlaşdırır. Gözləntilərə əsasən, Apple ilk iPhone Fold-u bu ilin sentyabrında yeni iPhone modelləri ilə birlikdə təqdim edə bilər. Şirkətin bununla yanaşı, 2027-ci il üçün ikinci, 2028-ci il üçün isə üçüncü nəsil qatlanan iPhone üzərində işlədiyi iddia olunur.

    Mark Qurmanın sözlərinə görə, üçüncü nəsil iPhone Fold əvvəlki modellərlə müqayisədə daha böyük ekranlara sahib ola bilər. Apple həm daxildəki əsas qatlanan ekranın, həm də cihazın xarici ekranının ölçüsünü böyütməyi nəzərdən keçirir. Daha əvvəl yayılan məlumatlarda ikinci nəsil iPhone Fold-un 2027-ci ilin sonlarında təqdim edilə biləcəyi bildirilmişdi. Həmin il iPhone-un 20 illiyi tamam olacaq və Apple-ın yubiley çərçivəsində məhsul xəttində daha böyük dəyişikliklər etməsi gözlənilir.

    İlk model satışa çıxmamış Apple-ın artıq üçüncü nəsil üzərində işləməsi qeyri-adi görünsə də, bu, şirkətin məhsul hazırlama strategiyasının bir hissəsidir. Apple kimi böyük istehsalçılar tədarük zəncirini və istehsal proseslərini illər əvvəldən planlaşdırdığı üçün eyni anda bir məhsulun bir neçə gələcək nəsli üzərində işləyə bilirlər.  Bununla belə, 2028-ci il üçün nəzərdə tutulan model hələ ilkin inkişaf mərhələsindədir.