Apple iPhone 15 Pro-lar üçün daha sürətli USB Type-C naqillərini təklif edəcək

    Apple bu il öz smartfonlarını ilk dəfə Lightning girişindən USB Type-C girişinə keçirəcək. Söhbət, iPhone 15 smartfonlarından gedir. Lakin son zamanlarda bu smartfonların USB Type-C çərçivəsində məlumatların hansı sürətlə ötürülməsini dəstəkləyəcəkləri barəsində mübahisələr yaranır. Keçən həftə ortaya çıxmış fotolarda iPhone 15 Pro modellərinin komplektlərinə daxil olacağı iddia edilən USB Type-C naqili əks olunmuşdu. Naqil son MacBook-ların şarj naqilləri kimi hörülmüş şəkildə reallaşdırılıb.

    İnsayderlərin sözlərinə əsasən iPhone 15 ilə iPhone 15 Plus-dakı USB Type-C məlumatların ötürülməsi mövzusunda USB 2.0 səviyyəsində olacaq. Yəni saniyədə 480 MB. iPhone 15 Pro ilə iPhone 15 Pro Max modellərinə gəldikdə isə onlardakı USB Type-C-nin USB 3.2 və ya Thunderbolt 3 səviyyəsində olacağı gözlənilir. İnsayderlər bildiriblər ki, Apple iPhone 15 Pro modelləri üçün üstəlik məlumatların saniyədə 40 Gbit sürətlə ötürülməsini mümkün edən USB 4 Gen 2 və Thunderbolt dəstəkli USB Type-C naqillərini də təklif edəcək. Lakin bu cür naqillər smartfonların komplektlərinə daxil olmayacaqlar. Şirkət onları ayrıca satacaq.