Apple iPhone üçün daha güclü AI hazırlayır

    Apple gələcəkdə iPhone-larda daha güclü süni intellekt funksiyalarını internet bağlantısı olmadan işlədə biləcək yeni texnologiya əldə edə bilər. Şirkətin bu istiqamətdə böyük dil modellərini (LLM) əhəmiyyətli dərəcədə kiçildə bilən PrismML adlı startapla əməkdaşlıq imkanlarını araşdırdığı bildirilir. Məlumata görə, PrismML 54 GB həcmində olan və 27 milyard parametrə sahib Qwen 3.6 modelini cəmi 4 GB ölçüsünə qədər sıxışdırmağa nail olub. Ən diqqətçəkən məqam isə odur ki, bu proses modelin performansına və cavab keyfiyyətinə demək olar ki, təsir göstərmir.

    Hazırda smartfonlarda işləyən süni intellekt modelləri adətən bir neçə milyard parametrə malik olur. Bu isə onların analiz və digər inkişaf etmiş funksiyalarını məhdudlaşdırır. Serverlərdə işləyən böyük modellər isə daha güclü olsa da, yüksək hesablama gücü və böyük yaddaş tələb etdiyindən mobil cihazlarda istifadə edilə bilmir. PrismML-in təqdim etdiyi texnologiya bu problemi həll etməyi hədəfləyir. Şirkətin iPhone üzərində sınaqdan keçirdiyi kiçildilmiş Qwen 3.6 modeli mürəkkəb dialoqlar qura, məntiqi analiz apara və hətta tam avtonom AI agentlərini işlədə bilir.

    Apple uzun müddətdir ki, süni intellekt funksiyalarını mümkün qədər birbaşa cihaz üzərində işlətməyə üstünlük verir. Bu yanaşma istifadəçi məlumatlarının məxfiliyini artırır, cavab müddətini qısaldır və internet bağlantısından asılılığı azaldır. Lakin indiyədək böyük modellərin cihazlara uyğunlaşdırılması zamanı performans problemləri əsas maneələrdən biri olub.