Apple kamera tətbiqini yenidən hazırlayır

    Technote.az “Engadget” platformasına istinadən bildirir ki, Apple iPhone istifadəçilərini maraqlandıracaq böyük kamera yenilikləri üzərində çalışır. Bloomberg-in tanınmış jurnalisti Mark Gurman tərəfindən paylaşılan məlumata görə, iOS 27 ilə birlikdə iPhone-un Kamera tətbiqi illər sonra ən böyük dəyişikliklərdən birini ala bilər. Şirkətin məqsədi həm peşəkar istifadəçilərə, həm də mobil fotoqrafiya həvəskarlarına daha çox idarəetmə imkanı təqdim etməkdir.

    Məlumata əsasən, Apple Kamera tətbiqini daha fərdiləşdirilə bilən hala gətirəcək. Hazırda istifadəçilər Apple-ın standart interfeysi ilə kifayətlənməli olur. Yeniləmədə isə ekran üzərindəki idarəetmə elementlərini dəyişmək mümkün olacaq. Məsələn, istifadəçi flaş, görüntü keyfiyyəti, Live Photos və digər seçimləri öz istədiyi qaydada yerləşdirə biləcək. Bunun üçün tətbiqdə xüsusi “Add Widgets” bölməsi yaradılacaq.

    Bundan əlavə, Kamera tətbiqinə daha inkişaf etmiş idarəetmələr əlavə ediləcək. Bunlara dərinlik effekti, ekspozisiya və Apple-ın “Photo Styles” funksiyası üçün əlavə nəzarət imkanları daxildir. Şirkət həmçinin çəkiliş zamanı yeni grid və level alətlərini də təqdim etməyə hazırlaşır. Maraqlı dəyişikliklərdən biri də bütün kamera idarəetmələrini açan düymənin yerinin dəyişdirilməsidir. Yeni interfeysdə bu düymə ekranın yuxarı hissəsindən çəkiliş düyməsinin yanına köçürüləcək.

    Apple süni intellekt funksiyalarını da Kamera tətbiqinə inteqrasiya etməyə hazırlaşır. Hazırda ayrıca işləyən “Visual Intelligence” funksiyası gələcəkdə birbaşa Kamera tətbiqində yerləşdirilə bilər. İstifadəçilər kamera vasitəsilə obyekt axtarışı edə, mətnləri tərcümə edə və digər AI funksiyalarından istifadə edə biləcəklər. Süni intellektin foto redaktə alətlərinə də yeni imkanlar gətirəcəyi bildirilir.