Apple məxfilik üçün video çəkməyən ağıllı ev kamerası hazırlaya bilər

    Yeni iddiaya görə, “Apple” şirkətinin hazırladığı ağıllı ev kamerasının videonu qeydə almayacağı gözlənilir. Qurğu evdəki hərəkətləri süni intellektlə təhlil edəcək və istifadəçiyə yalnız mətn formasında məlumat göndərəcək. Şirkət bununla ev daxilində şəxsi məlumatların qorunmasına üstünlük vermək istəyir.

    Layihə çərçivəsində kamera “J450” kod adı ilə hazırlanır və “J490” ağıllı ev ekranını tamamlayan qurğu sayılır. Kiçik cihaz silindr formasında olacaq və metal dodaq boyası qabını xatırladacaq. Sensorun kadr tezliyi çox aşağı olacaq. Yəni kamera hərəkəti adi təhlükəsizlik kameraları kimi fasiləsiz çəkməyəcək. Qurğu ilə ayrıca foto çəkməyin olub-olmayacağı hələ bilinmir.

    Kamera üzləri tanıyacaq və otağa kimin daxil olduğunu müəyyənləşdirəcək. Sistem həmin şəxsin tanış olub-olmadığı barədə istifadəçiyə xəbər verə biləcək. Ancaq ekranda nə video, nə də hadisənin görüntüsü göstəriləcək. Bu məhdudiyyət oğurluq zamanı polis üçün dəlil toplamağı çətinləşdirə bilər. Digər tərəfdən, evdə daim izlənmək narahatlığını azalda bilər.

    Məlumata görə, qurğu görüntü sensorunu süni intellektlə birləşdirərək məlumatları elə cihazın özündə emal edə bilər. “Sony IMX500” kimi sensorlar şəkilləri serverə göndərmədən təhlil etməyi bacarır. “Apple Home” sistemindəki “Detect Activity” seçimi də oxşar qaydada video yayımını dayandırır, amma hərəkəti izləməyə davam edir. Yeni kamerada bu üsulun daha geniş işlədiləcəyi deyilir.

    Kamera “Apple” şirkətinin hazırladığı yeni ağıllı ev sisteminin bir hissəsi olacaq. Sistemin mərkəzi sayılan ağıllı ev qurğusu oktyabrda göstərilə bilər. Daha güclü “HomePod mini” və “Apple TV” modellərinin də yeni “Siri” əsaslı süni intellekt funksiyaları ilə işləyəcəyi deyilir. Kameranın nə vaxt satışa çıxacağı hələ açıqlanmayıb.

    İddiaya görə, oxşar texnologiya kameralı “AirPods” modeli üçün də hazırlanır. “macOS Tahoe 26.7” sisteminin ilkin versiyasındakı kod hər qulaqlıqda kiçik kameranın ola biləcəyini göstərib. Kameralar aşağı keyfiyyətli RGB rəngli şəkillər çəkərək onları “Visual Intelligence” ilə təhlil edə bilər. Ancaq istifadəçilərin həmin kameralarla foto və ya video çəkə bilməyəcəyi gözlənilir.