Apple Music-də süni intellektlə yaradılan musiqilər məcburi şəkildə etiketlənəcək

    Apple Music platformasında süni intellektlə yaradılan musiqilərin müəyyən edilməsi daha asan olacaq. Apple bu ilin sonunda musiqi şirkətləri və distribütorlardan AI-dan istifadə edilərək hazırlanmış məzmunu xüsusi etiketlərlə qeyd etməyi tələb edəcək.

    Şirkət 2026-cı ilin martında Apple Music üçün AI Transparency Tags adlı şəffaflıq etiketlərini təqdim etmişdi. Bu etiketlər süni intellektin məzmunun əhəmiyyətli hissəsinin hazırlanmasında istifadə edildiyini göstərmək üçün nəzərdə tutulmuşdu. Lakin həmin vaxt etiketlərin tətbiqi məcburi deyildi.

   İndi isə Apple Music-in distribütorlarına göndərilən elektron məktubda şirkət yeni qaydanı açıqlayıb. Buna əsasən, süni intellektin məzmunun əhəmiyyətli hissəsinin yaradılmasında istifadə edildiyi bütün hallarda, o cümlədən tamamilə AI platformaları tərəfindən yaradılan treklərdə AI Transparency Tags tətbiq olunmalıdır.

    Yeni tələbin 2026-cı ilin sonlarına doğru qüvvəyə minməsi gözlənilir. Bununla belə, Apple-ın bu qaydanı necə tətbiq və nəzarət edəcəyi hələ məlum deyil. Hazırda bu etiketlər Apple Music istifadəçiləri üçün görünmür. Lakin Apple dinləyicilərə mümkün qədər çox məlumat təqdim etmək istədiyini bildirir. Bu isə gələcəkdə AI etiketlərinin birbaşa istifadəçilərə də göstərilə biləcəyi ehtimalını artırır.