Justin Gutman adlı britaniyalı vətəndaş Apple şirkətinə qarşı məhkəmə iddiası qaldırıb. Səbəb isə şirkətin illər əvvəl iPhone-lardakı batareyaların ömürlərini uzatmaq üçün smartfonların performanslarını bilərəkdən aşağı salmasındadır. Qeyd etmək lazımdır ki, Apple şirkətinin ətrafında cərəyan etmiş bu qalmaqal batterygate adı ilə tanınır. Apple etiraf edib ki, o, iPhone 6 və iPhone 6s modellərində batareyaların ömürlərini uzatmaq üçün həmin smartfonların performanslarını aşağı salıb. Təbii ki, istifadəçilər bundan xəbərdar deyildilər.

    Justin Gutman adlı britaniyalı vətəndaş bu məsələ ilə bağlı Apple şirkətinə qarşı məhkəmə iddiasını keçən il qaldırmışdı. İlk əvvəl 25 milyon istifadəçi tərəfindən qaldırılmış kollektiv məhkəmə iddiası çərçivəsində şirkətə təyin edilmiş cərimə məbləği 900 milyon dollar təşkil etmişdi. Lakin məhkəmə iddiasının qaldırılmasından 1 il sonra bu məbləğ 2 milyard dollara yüksəlib. Apple öz növbəsində sözügedən məhkəmə iddiasının ləğv edilməsinə çalışır. Şirkətin vəkilləri məhkəmə iddiasını əsaslandırılmamış adlandırıblar. Şirkət bildirib ki, o, 2017-ci ildə bu məsələ ilə bağlı istifadəçilərdən üzr istəyib və onlara smartfonlardakı batareyaların dəyişdirilməsi üçün endirimlər təklif edib.