Apple sızıntılara qarşı necə mübarizə aparır?

    Technote.az “Apple Insider” platformasına istinadən bildirir ki, Apple yeni məhsullarını təqdim etməmişdən əvvəl onların dizayn və marketinq materiallarının sızmasının qarşısını almaq üçün son dərəcə sərt təhlükəsizlik qaydaları tətbiq edir. Şirkətin daxilində və tərəfdaşlarında tətbiq olunan bu qaydalar sayəsində iPhone və ya iPad kimi cihazların rəsmi görüntüləri təqdimatdan əvvəl demək olar ki, ictimaiyyətə çıxmır.

    Apple-ın yanaşmasına görə, məxfi dizayn işlərinin aparıldığı otaqlar xüsusi kilid sistemləri, giriş kartları və tez-tez dəyişdirilən şifrələrlə qorunur. Bu məkanlarda hətta təmizlik işçilərinin belə girişinə ciddi məhdudiyyətlər qoyulur. İşçilərdən tələb olunur ki, masa üzərində, lövhələrdə və ya kompüter ekranlarında heç bir məxfi məlumat açıq vəziyyətdə qalmasın. Bütün fayllar şifrələnmiş formada saxlanılır və yalnız xüsusi təhlükəsiz serverlər vasitəsilə paylaşılır.

    Şirkət yalnız fiziki təhlükəsizliklə kifayətlənmir. Məxfi layihələrdə çalışan əməkdaşlar xüsusi yoxlamadan keçir, gizlilik müqavilələri imzalayır və layihə haqqında məlumatı yalnız “zəruri qədər” prinsipi ilə paylaşa bilirlər. Hətta daxili yazışmalarda belə məhsul adları əvəzinə kod adlarından istifadə olunur. Apple həmçinin dizayn fayllarının yayılmasının qarşısını almaq üçün texniki səviyyədə də tədbirlər görür. Məsələn, məhsulun hər detalı xüsusi CAD fayllarında modelləşdirilir və bu fayllar ciddi şəkildə qorunur. Çap edilən sənədlər isə dərhal götürülməli və istifadə olunmayan materiallar məhv edilməlidir.

    Bütün bu tədbirlərə baxmayaraq, bəzən hardware sızıntıları baş versə də, Apple-ın marketinq materialları çox nadir hallarda sızır. Bu da şirkətin təhlükəsizlik strategiyasının ümumilikdə effektiv olduğunu göstərir.