Apple standart iPhone 18-i 2027-ci ilin ilk yarısında təqdim edə bilər

    “Apple” bu il təqdimat planını dəyişib və ilk qatlanan “iPhone Duo”nu “iPhone 18 Pro” modelləri ilə birlikdə göstərib. Standart “iPhone 18” təqdimatda göstərilməyib. Əvvəlki iddialara görə, bahalaşan hissələr və istehsal çətinlikləri şirkəti daha bahalı modellərə üstünlük verməyə vadar edib. İndi gecikmənin “Samsung”la da bağlı ola biləcəyi deyilir.

    “Apple” standart “iPhone 18” üçün kamera sensorlarının hazır olmasını gözləyə bilər. Məlumata görə, “Samsung” bu sensorların sınaq nümunələrini 2026-cı ilin əvvəlində Texas ştatının Ostin şəhərində hazırlamağa başlayıb, sensorların kütləvi istehsalına payızda başlanacağı gözlənilir. Buna görə istehsal qrafiki standart modelin çıxış vaxtına təsir edə bilər.

    “Samsung” gələcək “iPhone” modellərində “Sony”-ni əvəz edə bilər. “Apple” uzun illərdir smartfon kameralarında “Sony” sensorlarından yararlanır. Şirkət ötən ilin avqustunda “Samsung”un Texasdakı zavodu ilə yeni çip istehsalı texnologiyası üzrə tərəfdaşlıq elan etmişdi. Çiplərin nə üçün hazırlandığı açıqlanmayıb, amma onların gələcək “iPhone” kameralarında işlədiləcəyi iddia olunur.

    “Sony” də kamera sensorları bazarında rəqabətin artmasına hazırlaşır. Şirkətin 5 noyabr tarixli maliyyə toplantısında maliyyə direktoru Lin Tao konkret müştərilərin adını çəkməyib. O, hissələrin bir neçə təchizatçıdan alınmasını adi təcrübə adlandırıb. “iPhone 18”-də hər biri 48 MP olan 2 kameranın qalacağı gözlənilir. Sensorlardan hər hansı birini “Samsung”un istehsal edib-etməyəcəyi hələ bilinmir.

    Standart “iPhone 18”-in 2027-ci ilin ilk yarısında göstəriləcəyi gözlənilir. Model həmin dövrdə “iPhone 18e” və “iPhone Air 2” ilə birlikdə satışa çıxa bilər. Ancaq mərhələli təqdimat planı barədə ilk iddialar 2025-ci ilin mayında, “Samsung”un sensor sınaqlarından əvvəl yayılmışdı. Buna görə kamera istehsalının gecikmənin əsas səbəbi olduğu təsdiqlənməyib. “Apple” da məsələ ilə bağlı rəsmi açıqlama verməyib.