Apple TV+ tarixinin ən çox izlənilən serialı məlum olub

    Technote.az “Mashable” platformasına istinadən bildirir ki, Apple TV+ “Pluribus” serialının platformanın tarixində ən çox izlənilən layihə olduğunu açıqlayıb. Şirkətin verdiyi məlumata görə, serial populyarlıq baxımından “Severance” və “Ted Lasso” kimi hitləri geridə qoyub. “Breaking Bad” serialının yaradıcısı Vince Gilligan tərəfindən ərsəyə gətirilən “Pluribus” distopik və sirli süjetə malikdir. Serialda Yer kürəsində insanların böyük əksəriyyəti vahid şüur, kollektiv ağıl kimi fəaliyyət göstərir. Yalnız 12 nəfər bu sistemdən kənarda qalır və hadisələr də məhz onların ətrafında cərəyan edir.

    Apple bu uğuru rəsmi şəkildə elan etsə də, məlumatlara ehtiyatla yanaşmaq tövsiyə olunur. Çünki şirkət adətən seriallar üzrə konkret baxış saylarını ictimaiyyətə açıqlamır. Hətta “Severance” serialının rejissoru Ben Stiller belə, layihənin neçə nəfər tərəfindən izlənildiyini dəqiq bilmədiyini bildirib. Buna baxmayaraq, “Pluribus”un qısa müddətdə Apple TV+ üçün ən böyük serial hadisəsinə çevrildiyi açıq şəkildə görünür.