Apple “vibe coding” tətbiqini yenidən App Store-dan sildi

    Technote.az “Apple Insider” platformasına istinadən bildirir ki, Apple ilə “vibe coding” tətbiqləri arasında gərginlik davam edir. iOS üçün hazırlanmış və istifadəçilərə kod yazmadan tətbiq yaratmağa imkan verən “Anything” adlı tətbiq qısa müddətlik App Store-a qayıtsa da, yenidən platformadan silinib.

    Məsələ ilk dəfə martın 30-da gündəmə gəlib. Həmin vaxt “Anything” tətbiqi App Store-dan çıxarılmışdı. İlkin ehtimallara görə, buna səbəb Apple-ın App Store qaydalarının 2.5.2 maddəsinin pozulması olub. Bu qaydaya əsasən, bir tətbiqin App Store yoxlama prosesindən keçmədən başqa tətbiqlər yaratmasına imkan verən funksiyalar qadağandır.

    “Anything” isə məhz bu cür işləyirdi. İstifadəçilər tətbiq daxilində yeni tətbiqlər yarada bilirdilər. Bu isə Apple-ın nəzarət mexanizmini faktiki olaraq kənardan keçmək kimi qiymətləndirilir. Tətbiq martın sonunda silindikdən sonra onun yaradıcıları Apple-ı tənqid edərək şirkətin “vibe coding” texnologiyasından qorxduğunu iddia etmişdi. Daha sonra onlar tətbiqin iMessage üzərindən işləyən versiyasını təqdim etdilər. Aprelin 3-də isə “Anything” komandası tətbiqin yenidən App Store-a qaytarıldığını elan etdi və bunu “qələbə” kimi təqdim etdi. Hətta bu münasibətlə 5000 dollarlıq hackathon və promo kredit kampaniyası da başladıldı. Epic Games-in rəhbəri Tim Sweeney də komandaya dəstək verərək onları təbrik etdi.

    Lakin bu “qələbə” uzun sürmədi. Aprelin 6-na olan məlumata görə, tətbiq yenidən App Store-dan yoxa çıxıb. Tətbiq axtarışda görünmür və birbaşa link açıldıqda onun artıq mövcud olmadığı göstərilir. Hazırda nə Apple, nə də “Anything” komandası tətbiqin niyə yenidən silindiyi barədə rəsmi açıqlama verməyib.