Apple Watch-dan daha səmərəli istifadə etməyin yolları

    Apple Watch istifadəçilərinin əksəriyyəti zənglərə cavab vermək, bildirişləri izləmək və fitness göstəricilərini ölçmək kimi əsas funksiyalardan istifadə edir. Lakin ağıllı saatda gündəlik həyatı daha rahat edən və çox vaxt diqqətdən kənarda qalan bir sıra imkanlar da mövcuddur. Bunlardan biri Apple Watch vasitəsilə Mac kompüterinin avtomatik kilidinin açılmasıdır. İstifadəçi saatı taxdığı halda Mac-a yaxınlaşdıqda parol daxil etmədən sistemə giriş edə bilər. Digər maraqlı funksiya isə “Backtrack” adlanır. Bu imkan istifadəçinin hərəkət marşrutunu yadda saxlayır və xüsusilə təbiətdə və ya tanımadığı ərazilərdə yolu itirdikdə geri qayıtmağa kömək edir.

    Yeni nəsil Apple Watch modelləri həmçinin jestlərlə idarəetməni dəstəkləyir. İstifadəçilər sadəcə barmaqlarını iki dəfə bir-birinə vuraraq zənglərə cavab verə, musiqini idarə edə və ya vidcetlər arasında keçid edə bilirlər. watchOS 26 ilə təqdim olunan “Wrist Flick” jesti isə bildirişləri və taymerləri sürətlə bağlamağa imkan verir. Apple Watch eyni zamanda iPhone kamerası üçün uzaqdan idarəetmə pultu kimi də istifadə oluna bilər. Bu xüsusiyyət qrup şəkilləri və ya məsafədən selfi çəkmək istəyənlər üçün olduqca əlverişlidir.

    Telefonunu tez-tez itirən istifadəçilər üçün də faydalı imkan mövcuddur. Saat vasitəsilə iPhone-u siqnalla çağırmaqla yanaşı, cihazın fənərini də aktivləşdirmək mümkündür ki, bu da qaranlıq mühitdə telefonu daha asan tapmağa kömək edir.