Apple yeni AirTag-i təqdim etdi: daha uzaqdan, daha dəqiq izləmə

    Technote.az “Apple Insider” platformasına istinadən bildirir ki, Apple uzun müddətdir şayiələri dolaşan yeni nəsil AirTag modelini rəsmi olaraq təqdim edib. İkinci nəsil AirTag daha dəqiq izləmə, daha uzun məsafə, daha səsli dinamik və gücləndirilmiş təhlükəsizlik xüsusiyyətləri ilə gəlir.

    Yeni AirTag-də əsas yeniliklərdən biri dəqiqliklə tapma məsafəsinin əhəmiyyətli dərəcədə artırılmasıdır. Birinci nəsil AirTag yalnız 15 metr (təxminən 50 fut) məsafədə dəqiq işləyirdisə, yeni Ultra Wideband çipi sayəsində bu məsafə artıq 60 metrə (200 fut) qədər yüksəlib. Bu da açıq havada və tanış olmayan məkanlarda itirilmiş əşyaların tapılmasını xeyli asanlaşdırır. Apple həmçinin dinamiki daha güclü edib. Şirkətin bildirdiyinə görə, yeni AirTag əvvəlki nəsillə müqayisədə 50 faiz daha yüksək səslə siqnal verə bilir və bu səs iki dəfə daha uzaqdan eşidilir. Bu xüsusiyyət xüsusilə istənməyən izləmələrin qarşısını almaq baxımından vacib sayılır.

    AirTag artıq ikinci nəsil Ultra Wideband çipi ilə təchiz olunub. Bu çip iPhone 17 seriyası və yeni Apple Watch modellərində də istifadə olunur. İstifadəçilər vizual, səsli və titrəmə (haptic) yönləndirmə ilə əşyalarına addım-addım yaxınlaşa bilirlər. Bluetooth əlaqəsi də təkmilləşdirilib və AirTag artıq Apple Watch üzərindən də izlənilə bilir. Təhlükəsizlik tərəfi də diqqətdən kənarda qalmayıb. Apple bildirir ki, AirTag istifadəçi məxfiliyini ön planda saxlayır. Cihazın özündə yer məlumatı saxlanılmır, bütün Find My şəbəkə əlaqələri isə ucdan-uca şifrələnir. Bundan əlavə, platformalararası xəbərdarlıqlar və tez-tez dəyişən Bluetooth identifikatorları istənməyən izləmələrə qarşı qoruma yaradır. Dizayn dəyişmədiyi üçün köhnə AirTag aksesuarları yeni model ilə tam uyğundur. Qiymət də əvvəlki kimidir: 1 ədəd – 29 dollar, 4-lü paket – 99 dollar.