Apple yeni smart home displeyini Siri AI yeniləməsinə görə gecikdirir

    Technote.az “The Verge” platformasına istinadən bildirir ki, Apple-ın uzun müddətdir haqqında danışılan ekranlı smart ev cihazının təqdimatı yenidən təxirə salınıb. Daha əvvəl 2025-ci il və daha sonra bu yaz üçün planlaşdırıldığı deyilən cihazın indi payız aylarında təqdim ediləcəyi gözlənilir.

    Kosutami adlı istifadəçi X-də paylaşdığı məlumatda cihazın buraxılış tarixinin dəyişdiyini bildirib. Ardınca Bloomberg jurnalisti Mark Gurman da oxşar məlumat verərək Apple-ın smart ev displeyinin şirkətin yeni süni intellekt əsaslı Siri yeniləməsi hazır olmadan təqdim edilməyəcəyini qeyd edib.

   Məlumata görə, J490 kod adlı smart ev displeyi Siri üçün hazırlanmış çatbot-tipli AI funksiyalarının tamamlanmasını gözləyir. Bu yeniləmənin əvvəlcədən hazır olması planlaşdırılsa da, indi ilin sonlarına doğru təqdim ediləcəyi proqnozlaşdırılır. Yenilənmiş Siri ilə birlikdə iOS 27, macOS və digər Apple əməliyyat sistemlərinin yeni versiyalarının da istifadəyə verilməsi gözlənilir.

    Cihazın gümüş rəngli alüminium korpusa, 7 düymlük ekrana və USB-C enerji girişinə sahib olacağı bildirilir. Smart displeyin tvOS 27 əsaslı xüsusi proqram təminatı ilə işləyəcəyi iddia olunur.

    Bundan əlavə, Apple-ın yeni HomePod modeli, yenilənmiş Apple TV 4K qurğusu və smart ev sensoru üzərində də çalışdığı, daha inkişaf etmiş robot qollu versiyanın isə 2027-ci ildə təqdim edilə biləcəyi deyilir.