Dünən ASUS özünün növbəti flaqman smartfonu olacaq Zenfone 10-un təqdimatını anons etdi. Smartfonun təqdimatı 29 iyun tarixində baş tutacaq. Bu səbəbdən şirkət smartfon barəsində bəzi məlumatları təqdim etməyə başlayıb. Beləliklə məlum olub ki, hal hazırda aktual olan Zenfone 9 kimi Zenfone 10 da kompakt ölçülü smartfon olacaq. Belə ki, o, 5.9 düym ekran ilə təchiz olunacaq. ASUS ekranın növü barəsində məlumat verməyib. Lakin çox güman ki, o, 120 Hz-lik təsvir yenilənməsinə sahib Full HD+ keyfiyyətli AMOLED ekran olacaq. Bununla yanaşı rəsmi olaraq məlum oldu ki, Zenfone 10 smartfonu Snapdragon 8 Gen 2 prosessoru vasitəsilə çalışacaq və naqilsiz şarj texnologiyasının dəstəyi ilə Gimbal 2.0 adlı 6 oxlu stabilizasiya sistemini əldə edəcək.