Audible “Read & Listen” funksiyasını təqdim etdi

    Technote.az “Mashable” platformasına istinadən bildirir ki, Audible istifadəçilər üçün yeni “Read & Listen” funksiyasını istifadəyə verib. Bu yenilik sayəsində artıq audiokitabı dinləyərkən eyni zamanda mətnini də real vaxt rejimində izləmək mümkün olacaq.

    Yeni funksiya istifadəçilərə dinləmə və oxuma rejimləri arasında bir toxunuşla keçid etməyə imkan verir. Mətn audiokitabla tam sinxron şəkildə hərəkət edir və sözbəsöz vurğulanır. Bu isə xüsusilə dil öyrənənlər, dərs hazırlayan tələbələr və hekayəyə daha dərindən fokuslanmaq istəyənlər üçün böyük üstünlük yaradır. “Read & Listen” funksiyası eyni zamanda istifadəçinin Kindle kitabxanasındakı uyğun e-kitabları avtomatik aşkar edir və tətbiqdə ayrıca bölmədə təqdim edir. Əgər istifadəçi uyğun e-kitabı artıq alıbsa, audiokitabı endirimli qiymətlə əldə edə bilər.

    Bu xüsusiyyət əvvəllər yalnız Kindle tətbiqində “Whispersync for Voice” təcrübəsinin bir hissəsi kimi mövcud idi. İndi isə tam inteqrasiya olunaraq birbaşa Audible tətbiqində əlçatan olub.