Xiaomi-nin Redmi brendi Avropa bazarında yeni büdcəli smartfonunu satışa çıxartmağa hazırlaşır. Söhbət, Redmi 12-dən gedir. İndi isə insayderlər onun texniki özəllikləri barəsində məlumat veriblər. Onların sözlərinə əsasən Redmi 12 smartfonu 90 Hz-lik təsvir yenilənməsinə sahib Full HD+ keyfiyyətli 6.79 düym TFT ekran ilə təchiz olunacaq.

    Smartfon MediaTek Helio G88 prosessoru vasitəsilə çalışacaq və özündə 4 GB RAM-ı, 128 GB daxili yaddaş həcmini (1 TB-a kimi microSD dəstəkli) və 18 vatt gücündə sürətli şarj texnologiyalı 5000 mAh enerji tutumlu batareyanı birləşdirəcək. Bununla yanaşı smartfon naqilli qulaqlıqlar üçün nəzərdə tutulmuş 3.5 mm-lik audiogirişə sahib olacaq.

    Kameralara gəldikdə isə Redmi 12 smartfonu 50 MP + 8 MP + 2 MP üçlü arxa kamera və 8 MP-lik ön kamera ilə təchiz olunacaq. Smartfonun MIUI 13 interfeysli Android 12 vasitəsilə çalışacağı güman edilir. İnsayderlərin sözlərinə əsasən Redmi 12 Avropa bazarında 2 iyun tarixində təqdim ediləcək.