Braziliya bankları iPhone NFC-yə ödənişsiz çıxış istəyir

    Technote.az “Apple Insider” platformasına istinadən bildirir ki, Braziliyada banklar və ödəniş provayderləri iPhone-un NFC texnologiyasına ödənişsiz çıxış tələb edir. Administrative Council for Economic Defense (CADE) bu məsələ ilə bağlı Apple-a qarşı antimonopoliya araşdırması aparır.

    Mübahisənin mərkəzində iPhone-larda NFC əsaslı ödəniş sistemlərinə giriş dayanır. Apple hazırda banklardan və ödəniş şirkətlərindən hər tranzaksiya üçün ödəniş alır. Braziliya bankları və CADE isə bunun rəqabətə zidd addım olduğunu iddia edirlər. Xüsusilə Braziliyanın məşhur ani ödəniş sistemi olan Pix QR-kod ödənişlərindən NFC ödənişlərinə keçmək istəyir. Android cihazlarında bu imkan artıq mövcuddur, lakin iPhone-da NFC istifadə etmək üçün Apple-a ödəniş edilməlidir.

    Apple isə ittihamları qəbul etmir. Şirkət bildirir ki, banklar və üçüncü tərəf provayderlər onun “mülkiyyət texnologiyasından pulsuz istifadə etmək” istəyirlər. Apple vurğulayır ki, Apple Pay Braziliyada 2018-ci ildən fəaliyyət göstərir və artıq 40-dan çox bank və maliyyə qurumu tərəfindən dəstəklənir. Şirkət həmçinin qeyd edir ki, iPhone-un Braziliya bazarındakı payı cəmi 10 %-dir. Apple-a görə, bu göstərici onun bazarda dominant mövqedə olmadığını göstərir və NFC üçün alınan ödənişləri antirəqabət addımı kimi qiymətləndirmək düzgün deyil.