Bu adapter köhnə cihazları USB-C ilə işlətməyə imkan verir

    Werewolf şirkətinin hazırladığı VFLEX adlı kiçik adapter köhnə elektron cihazları USB-C enerji mənbələri ilə işlətməyə imkan verir. Bunun üçün cihazın özündə USB-C girişinin olması tələb edilmir. VFLEX köhnə cihazlarda geniş istifadə olunan dairəvi “barrel jack” enerji girişini USB-C ilə uyğunlaşdırır. Bu həll xüsusilə köhnə monitorlar, oyun konsolları, xarici sərt disklər və digər elektron cihazlar üçün faydalıdır. Məsələn, 1990-cı ildə satışa çıxarılan Nintendo Super Famicom kimi USB-C-dən çox əvvəl istehsal edilmiş cihazı belə uyğun adapter vasitəsilə müasir USB-C powerbank-dan enerji ilə təmin etmək mümkündür. Sistemin əsasını təxminən 8 dollara satılan VFLEX adapteri və müxtəlif ölçülü enerji girişlərinə uyğun təxminən 4 dollarlıq başlıqlar təşkil edir. İstifadəçi VFLEX-i əvvəlcə smartfona qoşaraq cihaz üçün tələb olunan gərginliyi seçir. Daha sonra adapter USB-C şarj cihazına və ya powerbank-a, digər tərəfdən isə köhnə cihazın enerji girişinə qoşulur.

    VFLEX-in maraqlı xüsusiyyəti gərginliyi özü çevirmək əvəzinə USB-C Power Delivery protokollarından istifadə edərək enerji mənbəyindən tələb olunan gərginliyi istəməsidir. Beləliklə, uyğun USB-C powerbank və ya adapter olduqda köhnə cihazların ayrıca enerji blokuna ehtiyac qalmaya bilər. Məsələn, sınaq zamanı Asus monitoru, Super Famicom konsolu və RCA-HDMI çeviricisi eyni portativ batareyadan enerji ilə təmin edilib. Monitor təxminən 24 Vt, oyun konsolu 2 Vt, HDMI adapteri isə 1 Vt-dan az enerji sərf edib. 1989-cu il istehsalı olan Game Boy-un enerji sərfiyyatı isə cəmi 0,33 Vt ölçülüb. Bu göstəriciyə əsasən, kiçik powerbank belə cihazı nəzəri olaraq 90 saatdan çox işlədə bilər. Lakin VFLEX-dən istifadə edərkən cihazın tələb etdiyi gərginliyi düzgün müəyyənləşdirmək vacibdir. Məsələn, 19 volt tələb edən monitora uyğun gərginlik verilməlidir. Yanlışlıqla daha yüksək gərginliyin köhnə və həssas cihazlara ötürülməsi onların zədələnməsinə səbəb ola bilər.

    Digər məhdudiyyət USB-C şarj cihazlarının dəstəklədiyi gərginliklərlə bağlıdır. Standart USB-C PD adapterləri əsasən 5, 9, 15 və 20 volt, daha güclü EPR adapterləri isə 28 volt və daha yüksək səviyyələri dəstəkləyə bilər. Aralıq gərginliklər tələb edən cihazlar üçün isə PPS — proqramlaşdırıla bilən enerji təchizatı dəstəyinə ehtiyac yarana bilər. Werewolf tətbiqi bu prosesi sadələşdirir. İstifadəçi cihazları və USB-C enerji mənbələrini tətbiqdə yadda saxlaya bilər. Daha sonra konkret cihaz seçildikdə tətbiq saxlanılmış şarj cihazlarından hansının ona uyğun olduğunu göstərə bilir. Bəzi köhnə cihazlarda əlavə olaraq enerji girişinin qütblənməsinə diqqət yetirmək lazımdır. Nintendo Game Boy və Super Famicom kimi bəzi cihazlarda mərkəzi pin mənfi qütblüdür. Belə hallarda xüsusi əks qütblü konnektordan istifadə edilməlidir.