Büdcəli Samsung Galaxy A05s smartfonu təqdim edilib

    Samsung şirkəti Galaxy A seriyasının yeni büdcəli modeli olan Galaxy A05s-i təqdim etdi. Bu yeni smartfon plastik materialdan hazırlanmış gövdəyə sahib olsa da, özündə sudan qorunma özəlliyini birləşdirir. Smartfon 90 Hz-lik təsvir yenilənməsinə sahib Full HD+ keyfiyyətli 6.7 düym PLS LCD ekranla təchiz olunub. Ekranın yuxarı mərkəz hissəsində damcı formalı çıxıntı yerləşdirilib. Barmaq izi skanı texnologiyası yandırıb/söndürmə düyməsinə inteqrasiya edilib.

    Smartfon kontaktsız ödənişlər üçün NFC çipinə sahib deyil. Əsas texniki göstəricilərə gəldikdə isə Galaxy A05s Snapdragon 680 prosessoru, 6 GB RAM, 128 GB daxili yaddaş həcmi, 50 MP + 2 MP + 2 MP üçlü arxa kamera, 13 MP-lik ön kamera və 25 vatt gücündə sürətli şarj texnologiyalı 5000 mAh enerji tutumlu batareya ilə təchiz olunub. Smartfon həmçinin naqilli qulaqlıqlar üçün 3.5 mm-lik audiogirişə də sahibdir. Galaxy A05s OneUI Core interfeysli Android 13 vasitəsilə çalışır. Samsung bu yeni smartfonun satış qiyməti barəsində hələ heç bir məlumat verməyib.