ChatGPT üçün Apple Messages əlavəsi təqdim edildi

    OpenAI ChatGPT üçün Apple Messages əlavəsini istifadəyə verib. Yeni funksiya istifadəçilərə “Messages” tətbiqindəki yazışmalarını birbaşa ChatGPT vasitəsilə axtarmaq, analiz etmək, çeşidləmək və redaktə etmək imkanı yaradır. Şirkətin məlumatına görə, əlavə yalnız şəxsi istifadə üçün nəzərdə tutulmayıb. O, Codex və ChatGPT Work ilə də işləyir. Bu isə istifadəçilərə mesajlardan peşəkar məqsədlərlə də yararlanmağa imkan verir.

   Yeni funksiyanın imkanlarını nümayiş etdirən qısa reklam çarxında istifadəçinin ötən gün aldığı mesajlara əsasən kontaktlarına göndərə biləcəyi cavab mesajlarını ChatGPT-dən hazırlamasını istədiyi göstərilir.

    Bundan əlavə, istifadəçilər ChatGPT-dən müəyyən mesajları silməyi, onların adından mesaj hazırlayıb göndərməyi və uzun müddət əvvəl yazılmış mesajların içərisində konkret məlumatları axtarmağı xahiş edə biləcəklər.

    Bununla belə, yeni funksiya məxfiliklə bağlı suallar da yaradır. OpenAI Bloomberg-ə açıqlamasında əlavənin istifadəçinin cihazında lokal şəkildə işlədiyini və bütün mesajların indeksini yaratmadığını bildirib. Şirkət bunun texniki olaraq necə həyata keçirildiyi barədə daha ətraflı məlumat verməyib.