Çində iPhone-ların qiymətləri kəskin şəkildə aşağı düşüb

     ABŞ bazarının reallıqları fonunda Apple müştəriləri hazırda daha çox qiymət artımı ehtimalını və iPhone istehsalının əsas hissəsinin Çin əvəzinə ABŞ üçün Hindistana köçürülməsi məsələsini müzakirə edirlər. Lakin Çin bazarında tamamilə fərqli hadisələr baş verir. Bəzi ticarət platformalarında iPhone 16 seriyasına daxil olan smartfonların qiyməti 30%-dən çox azalıb. Bu barədə South China Morning Post nəşri məlumat verib və vurğulayıb ki, Çində müşahidə edilən qiymət azalması rəsmi xarakter daşımır. Lakin bir çox ticarət platformalarında faktiki qiymətlər kifayət qədər nəzərəçarpacaq şəkildə aşağı salınıb.

     Sirr deyil ki, ötən ilin sonundan etibarən Apple-ın Çindəki satış statistikasına, ölkə daxilində istehsal olunan və dəyəri 832$-dan az olan smartfonların alıcıları üçün yerli hakimiyyət tərəfindən nəzərdə tutulan subsidiyalar mənfi təsir göstərir. Apple smartfonlarının satıcıları bu stimullaşdırıcı tədbirlərə cavab olaraq məhsullarına endirim tətbiq etmək məcburiyyətində qalıblar. Bəzi hallarda bu endirimlər 346$-dək və ya 128 GB yaddaşa sahib iPhone 16 Pro modelinin dəyərinin təxminən 31%-nə qədər ola bilər. Formal olaraq belə endirimlər Apple məhsullarını Çin şəhərlərinin sakinlərinə smartfon satışını subsidiyalaşdıran proqramın tələblərinə uyğun hala gətirir.

     JD.com platformasında 256 GB yaddaşa sahib iPhone 16 Pro Max modelləri 14% ucuzlaşıb, baxmayaraq ki, Apple-ın Çindəki rəsmi saytında bu cür dəyişikliklər göstərilmir. ITHome portalının məlumatına görə, qiymətlərin aşağı salınması təşəbbüsü yenə də Apple-dan gəlir. Belə ki, şirkət Çin üzrə ticarət tərəfdaşlarına hər iPhone üçün 176$-a qədər endirim təklif edə biləcəyini bildirib. IDC-nin məlumatına əsasən, bu ilin birinci rübündə Apple-ın Çinin daxili bazarına iPhone tədarükü 9% azalaraq 9.8 milyon ədəd təşkil edib. 5 əsas brend arasında yalnız Apple mənfi tədarük dinamikası nümayiş etdirib.

Mənbə: South China Morning Post