Çinin ən böyük mobil operatoru iPhone 15 satışlarından imtina edə bilər

    Çin hökuməti mərkəzi dövlət idarələrinin məmurlarına iPhone-lardan istifadəni artıq qadağan edib. Biraz əvvəl isə məlum oldu ki, Çin bu qadağanı daha çox dövlət idarəsi və şirkətinə tətbiq edəcək. İndi isə məlum olub ki, Çinin ən böyük mobil operatoru olan China Mobile ümumiyyətlə iPhone 15 smartfonlarının satışlarından imtina edəcək. Bu barədə məlumatı Bloomberg saytının məşhur insayderi Mark Gurman təqdim edib. Çin Apple üçün ən böyük xarici bazardır və bu bazar şirkətin bütün gəlirlərinin 1/5 hissəsini təmin edir. Qeyd etmək lazımdır ki, artıq ilk dəfə deyil ki, iPhone Vaşinqton ilə Pekin arasındakı gərginliyin qurbanına çevrilir.

    Məsələn 2019-cu ildə iki ölkə arasında start götürmüş ticarət müharibəsi çərçivəsində Çində iPhone XR və iPhone XS modellərinin satışları aşağı düşmüşdü. Lakin 2021-ci və 2022-ci illərdə Apple yaranmış bu mənfi hallardan yaxa qurtara bilmişdi. Görünür, bu il hər şey daha ciddi olacaq. Rəsmi ABŞ hələ də Huawei və ByteDance (TikTok-un sahibi) şirkətlərinə ciddi şübhə ilə yanaşır. Çinin sosial şəbəkələrində isə Apple məhsullarına qarşı əhval-ruhiyyələr artmaqda davam edirlər. Digər tərəfdən Çinin bu cür radikal addımlar atması ona sərf etmir. Belə ki, Apple ölkədə milyonlarla vətəndaşı iş yeri ilə təmin edir. Nəticədə Apple məhsullarının irmiqyaslı şəkildə ölkədə qadağan edilməsi Çinin iqtisadiyyatına da ciddi zərbə vura bilər.