Clicks BlackBerry ruhunu yaşadan yeni smartfonunu nümayiş etdirib

    Fiziki klaviaturalı telefonları sevənlər üçün maraqlı bir alternativ ortaya çıxıb. Clicks Technology şirkəti yeni Communicator smartfonunun işçi prototipini nümayiş etdirən video yayımlayıb. Şirkətin bu cihazı uzun illər bazarda dominant olan BlackBerry telefonlarını xatırladan dizaynı və funksiyaları ilə diqqət çəkir.

    499 dollar qiymət etiketi ilə satışa çıxacaq Communicator-un 2026-cı ilin dördüncü rübündə istifadəçilərə çatdırılması planlaşdırılır. Cihaz 4 düymlük AMOLED ekran və onun altında yerləşən fiziki klaviatura ilə təchiz olunub. Klaviatura sadəcə yazı yazmaq üçün deyil, həm də sensor panel kimi işləyərək istifadəçilərə ekranı toxunmadan mesajlar və veb səhifələr arasında gəzməyə imkan verir. Şirkətin sözlərinə görə, düymələr hazırda satılan iPhone üçün Clicks klaviatura örtüklərindən 30% daha böyükdür.

    Telefonun ən fərqli xüsusiyyətlərindən biri isə Signal Light adlı işıqlandırma sistemidir. Cihazın yan tərəfində yerləşən bu düymə müəyyən kontaktlardan, qruplardan və ya tətbiqlərdən bildiriş gəldikdə istifadəçinin seçdiyi rəngdə yanır. Bu da telefonun ekranını tez-tez açmadan yalnız vacib bildirişlərə diqqət yetirməyə imkan verir.

    Communicator Android əməliyyat sistemi üzərində işləyir və xüsusi hazırlanmış Niagara Launcher interfeysi ilə gəlir. Şirkət bu interfeysi sosial şəbəkələrdən daha çox mesajlaşma və məhsuldarlığa fokuslanan istifadəçilər üçün hazırlayıb. Şirkət Communicator-u əsasən mətnlə işləyən və smartfonlardan daha az diqqət yayındıran təcrübə istəyən istifadəçilər üçün ikinci cihaz kimi təqdim edir. Bununla belə, telefon tam Android ekosistemini dəstəklədiyi üçün əsas smartfon kimi istifadə olunmasına da heç bir məhdudiyyət qoyulmur.