Cozyla CES-də 55 düymlük nəhəng ailə təqvimini təqdim etdi

    Technote.az “Engadget” platformasına istinadən bildirir ki, CES sərgisində Cozyla ailələr üçün nəzərdə tutulmuş nəhəng ölçülü yeni ağıllı ekranını nümayiş etdirib. Calendar+ Max adlanan bu cihaz 4K keyfiyyətli, 55 düymlük displeyə malikdir və klassik ailə planlayıcısı ilə smart televizor və ağıllı ev mərkəzinin xüsusiyyətlərini bir araya gətirir.

    Android əməliyyat sistemi üzərində çalışan Calendar+ Max ailə üzvləri üçün ortaq təqvim, qeydlər, tapşırıqlar, ev işləri və yemək planları yaratmağa imkan verir. Cihaz Google, Apple, Yahoo və Outlook təqvimləri ilə sinxron işləyir, eyni zamanda Google Play Store üzərindən müxtəlif tətbiqləri dəstəkləyir. Bununla yanaşı, böyük ekran sayəsində Netflix, YouTube və digər platformalardan serial və filmlərə baxmaq mümkündür. Telefonunuzdakı fotoları birbaşa ekrana ötürmək, slayd-şou və ya “foto divar” rejimi yaratmaq da cihazın imkanları sırasındadır. Calendar+ Max ağıllı ev inteqrasiyasını da dəstəkləyir. Təhlükəsizlik kameraları və video zəng qapılarının görüntülərini böyük ekranda izləmək olar. Ekranın üzərindəki kamera isə FaceTime və Zoom vasitəsilə videozənglər etməyə imkan verir.

    Təkərli dayaq üzərində təqdim olunan cihaz ev daxilində rahatlıqla daşına bilir və daxili batareyası ilə təxminən 6 saat enerji təmin edir. Portret rejimi ev tapşırıqları üçün, landşaft rejimi isə film izləmək üçün optimallaşdırılıb. Ən diqqətçəkən məqamlardan biri isə abunə haqqının olmamasıdır. Cozyla digər məhsullarında olduğu kimi Calendar+ Max üçün də aylıq və ya illik ödəniş tələb etmir. Cihazın satış tarixi və qiyməti hələ açıqlanmayıb.