DJI kameraları üçün Mimo tətbiqinə açıq mənbəli alternativ hazırlanıb

    DJI-nin Osmo kameralarından istifadə edənlər çəkdikləri görüntüləri telefonda rahat şəkildə izləmək və yükləmək üçün əsasən şirkətin rəsmi DJI Mimo tətbiqindən istifadə etməli olurlar. İndi isə açıq mənbəli yeni tətbiqlər istifadəçilərə DJI-nin rəsmi proqramından asılı olmadan kameralarını idarə etmək imkanı verməyə başlayıb. DJI məhsullarını yaxından izləyən proqramçı Konrad Iturbe tərəfindən hazırlanan Osmosis adlı pulsuz və açıq mənbəli tətbiq bunun ilk nümunələrindən biridir. Tətbiqin hazırlanmasında Anthropic-in Claude süni intellektindən də istifadə olunub.

    Osmosis-in işləməsi üçün DJI kameralarının rəsmi Osmo tətbiqi ilə əlaqə yaratmaq üçün istifadə etdiyi protokol tərs mühəndislik üsulu ilə araşdırılıb. Nəticədə tətbiq kameraya simsiz qoşularaq çəkilmiş foto və videoları idarə edə bilir. Tətbiq vasitəsilə istifadəçilər kameradakı faylları telefona yükləyə, foto və videoların kiçik önizləmələrini görə və aşağı keyfiyyətdə videolara baxa bilirlər. Bundan başqa, videoları kəsmək, seçilmiş faylları favoritlərə əlavə etmək, yalnız foto və ya videoları göstərmək və yüklənəcək faylları növbəyə əlavə etmək mümkündür. Osmosis hazırda Osmo Pocket 3, Osmo Pocket 4P, Osmo Nano, Osmo Action 5 Pro və Osmo Action 6 kimi modellərdə sınaqdan keçirilib.