DuckDuckGo brauzeri YouTube reklamlarını bloklamağa başladı

    Məxfiliyə yönəlmiş internet brauzeri DuckDuckGo yeni funksiyasını təqdim edib. Yeniləmə sayəsində istifadəçilər brauzer üzərindən izlədikləri videolarda, o cümlədən YouTube reklamlarının böyük hissəsini avtomatik olaraq bloklaya biləcəklər. Şirkətin açıqlamasına görə, reklamların aşkarlanması və bloklanması məşhur açıq mənbəli uBlock Origin filtr siyahılarından istifadə etməklə həyata keçirilir. Bununla yanaşı, daha yaxşı uyğunluq təmin etmək üçün DuckDuckGo öz əlavə filtr qaydalarını da tətbiq edir.

    Şirkət bildirir ki, bəzi hallarda videoların yüklənməsi bir qədər uzun çəkə və ya nadir texniki problemlər yarana bilər. Buna baxmayaraq, funksiyanın əksər hallarda normal işlədiyi qeyd olunur. Yeni imkan iPhone, Windows və macOS platformalarında DuckDuckGo istifadəçiləri üçün standart olaraq aktiv olacaq. Android versiyasında isə yaxın vaxtlarda avtomatik aktiv ediləcək. İstifadəçilər istəsələr, funksiyanı brauzerin ayarlar bölməsindən əl ilə aktivləşdirə və ya söndürə bilərlər.

    Qeyd etmək lazımdır ki, bu funksiya yalnız videolar DuckDuckGo brauzeri üzərindən izlənildikdə işləyir. Yəni YouTube tətbiqində baxılan videolardakı reklamları bloklamır.