Dyson PencilWash-ı təqdim etdi

    Technote.az “Engadget” platformasına istinadən bildirir ki, Dyson yeni nəsil PencilWash modelini təqdim edib. Şirkət ötən il “dünyanın ən incə tozsoranı” kimi təqdim etdiyi Dyson PencilVac modelindən sonra indi də eyni konsepsiyanı yaş təmizləmə cihazına tətbiq edir.

    PencilWash yüngül, incə və kompakt quruluşu ilə fərqlənir. Cihazın tutacağı yuxarıdan aşağıya cəmi 1,5 düym (təxminən 3,8 sm) diametrindədir və ümumi çəkisi 2 kiloqramdan bir qədər çoxdur. Bu incə dizayn sayəsində cihaz demək olar ki, tam üfüqi vəziyyətə qədər əyilə bilir. Nəticədə istifadəçilər dar künclərə və alçaq mebellərin altına daha rahat şəkildə daxil ola bilirlər. Kiçik mənzillər üçün isə bu ölçülər saxlanmanı da xeyli asanlaşdırır.

     Şirkətin bildirdiyinə görə, PencilWash döşəməyə yalnız təmiz su tətbiq edir və ləkələri sürətlə aradan qaldırdıqdan sonra səth tez quruyur. Yüksək sıxlıqlı mikrofiber rulon həm yaş, həm də quru çirkləri bir keçiddə təmizləmək üçün nəzərdə tutulub. Ənənəvi filtr sisteminin olmaması isə toplanmış kirin cihaz daxilində qalması və xoşagəlməz qoxuların yaranması riskini azaldır.

    Cihazın üzərində batareya səviyyəsini göstərən ekran yerləşir. İstifadə edilmədiyi zaman isə tutacaq xüsusi enerji doldurma stansiyasına yerləşdirilə bilir. Qiymətə gəlincə, Dyson PencilWash 349 dollara satışa çıxarılacaq. Rəsmi satış tarixi hələ açıqlanmayıb.