Galaxy S21-in maya dəyərinin Galaxy S20-nin maya dəyərindən daha aşağı olduğu məlum olub

    Counterpoint Research şirkətinin analitikləri Galaxy S21 ilə Galaxy S20 flaqman smartfonlarının istehsal qiymətlərini müqayisə ediblər. Tədqiqat çərçivəsində məlum olub ki, Galaxy S20 ilə müqayisədə Galaxy S21-in istehsalı Samsung şirkətinə daha ucuz başa gəlir. Məlumatda qeyd edilib ki, 128 GB daxili yaddaşa sahib Galaxy S21 Ultra modelinin istehsal xərci 533$ təşkil edir. Bu isə Galaxy S20 Ultra-nın istehsal xərcindən 7% aşağıdır. Bununla belə Galaxy S21-in performansı keçən ilki modeldən qat-qat yüksəkdir.

    Tədqiqata əsasən Samsung şirkəti millimetrlik diapazonlar üçün olan anten modullarının sayını azaldaraq Galaxy S21-in istehsal xərcini aşağı sala bilib. Bununla yanaşı şirkət bu ilki smartfonların komplektlərindən qulaqlıqları, şarj cihazlarını çıxardıb və smartfonlarda ToF kamera sensorundan imtina edib. Buna görə də Galaxy S20 və S20+ modelləri ilə müqayisədə Galaxy S21-in istehsal xərci 12%, S21+ modelinin istehsal xərci isə 13% aşağı düşüb. Qeyd etmək lazımdır ki, şirkət bu il həmçinin Galaxy S21 FE modelini də təqdim etməyi planlaşdırır. Onun avqust ayında təqdim olunacağı güman edilir.