Galaxy Unpacked 2026 yaxınlaşır!

    Technote.az “Engadget” platformasına istinadən bildirir ki, Samsung 2025-ci ili yeni qatlanan smartfonlar, ultra-incə dizayn yanaşması və Google-un XR platformasının istifadəyə verilməsi ilə yadda qaldı. Şirkətin ilin ilk Galaxy Unpacked tədbirini fevral ayında keçirməsi və burada Galaxy S26 seriyasını təqdim etməsi gözlənilir.

    Engadget tədbiri canlı yayımlayacağını və təqdimatdan dərhal sonra yeni smartfonlarla bağlı ilkin təəssüratları paylaşacağını bildirib. Rəsmi dəvət hələ açıqlanmasa da, mövcud sızıntılar Samsung-un Galaxy Unpacked 2026-da nələri təqdim edəcəyinə dair kifayət qədər aydın təsəvvür yaradır. Samsung-un əvvəlki illərdəki ehtiyatlı dizayn strategiyasını Galaxy S26 seriyasında da davam etdirəcəyi gözlənilir. Sızıntılara əsasən, Galaxy S26, S26+ və S26 Ultra modelləri Galaxy S25 xəttinə bənzər dizayna sahib olacaq: düz ön ekran, düz çərçivə, yumru künclər və arxa hissədə şaquli yerləşdirilmiş kamera bloku. Əsas dəyişikliklərin dizayndan çox, daxili komponentlərdə, ekran, prosessor və kamera sensorlarında olacağı bildirilir.

Yeni seriyanın bütün modellərində Qualcomm-un Snapdragon 8 Elite Gen 5 prosessorunun istifadə ediləcəyi gözlənilir. Bununla yanaşı, bəzi regionlarda Samsung-un öz istehsalı olan Exynos 2600 çipinin də tətbiq oluna biləcəyi bildirilir. Hər iki halda Galaxy S26 modellərinin əvvəlki nəsillə müqayisədə daha yüksək performans və xüsusilə cihazdaxili süni intellekt imkanları təqdim edəcəyi gözlənilir. Galaxy S26 modelinin 6,3 düymlük FHD+ ekrana sahib olacağı, 12 GB RAM, 256 və ya 512 GB yaddaş variantları və 4 300 mAh batareya ilə gələcəyi bildirilir. Kamera tərəfdə isə dəyişiklik yoxdur: 50 MP əsas kamera, 12 MP ultra-geniş bucaq, 10 MP 3x telefoto və 12 MP ön kamera saxlanılır. Galaxy S26+ modelində dəyişikliklər daha da minimal olacaq. Yeni prosessor istisna olmaqla, 6,7 düymlük ekran, 4 900 mAh batareya, 12 GB RAM və eyni kamera sistemi qorunacaq.

Galaxy S26 Ultra-da dəyişikliklər daha nəzərəçarpandır. Kameraların bir qədər daha çıxıntılı olacağı və metal çərçivə ilə vizual olaraq seçiləcəyi bildirilir. Bundan əlavə, Samsung-un titandan yenidən alüminium çərçivəyə qayıtması ehtimal edilir. Ən maraqlı yenilik isə Qi2 simsiz enerji yığma standartı ilə bağlıdır. Şayiələrə görə, Samsung S Pen üçün istifadə olunan digitizer qatını çıxararaq yeni stilus texnologiyasına keçə bilər. Bu isə S26 Ultra-nın Qi2 aksesuarları ilə daha rahat işləməsinə imkan verəcək.

Samsung-un “Plus” modelini tam əvəzləyəcək fərqli bir Edge form-faktoru üzərində işlədiyi iddiaları təsdiqini tapmayıb. Galaxy S26 Edge-in ayrıca model kimi qalacağı gözlənilir. Sızıntılara əsasən, cihaz Pixel və iPhone Air dizaynını xatırladan düzbucaqlı kamera moduluna və daha incə – təxminən 5,5 mm qalınlığa sahib ola bilər.