Galaxy Z Fold 5 ilə Z Flip 5 hansı gücdə sürətli şarj texnologiyasını əldə edəcək?

    Samsung şirkətinin növbəti qatlana bilən smartfonları olacaq Galaxy Z Fold 5 ilə Z Flip 5 barəsində məlumatlar internetdə ortaya çıxmağa davam edirlər. Bu dəfə sözügedən smartfonlar Çinin 3C adlı sertifikatlaşdırma agentliyində qeydiyyatdan keçiblər. Onlardan biri SM-F7310, digəri isə SM-F9460 model nömrəsinə sahibdir. Sertifikatlaşdırma agentliyinin məlumatlar bazasındakı dokumentasiyaya əsasən Galaxy Z Fold 5 ilə Z Flip 5 25 vatt gücündə sürətli şarj texnologiyasının dəstəyini əldə edəcəklər.

    Qeyd etmək lazımdır ki, keçən ilki Galaxy Z Fold 4 ilə Z Flip 4 də 25 vatt gücündə sürətli şarj texnologiyasının dəstəyinə sahibdirlər. Çindən olan brendlər isə öz qatlana bilən smartfonlarında artıq 120 vatt gücündə sürətli şarj texnologiyasını təklif edirlər. Digər texniki göstəricilər baxımından Galaxy Z Fold 5 ilə Z Flip 5-in Snapdragon 8 Gen 2 for Galaxy prosessoru, yüksək təsvir yenilənməsinə sahib AMOLED ekran və 4500-5000 mAh enerji tutumlu batareya ilə təchiz olunacaqları gözlənilir. Qeyd etmək lazımdır ki, Samsung öz yeni qatlana bilən smartfonlarını avqust ayında təqdim etməldir.